პოლიტიკა
შეხვედრა შვეიცარიის პრეზიდენტ დიდიე ბურკჰალტერთან
საქართველო, 27 იანვარი, საქინფორმი. 24 იანვარს საქართველოს პრემიერ-მინისტრი ირაკლი ღარიბაშვილი დავოსში, შვეიცარიის კონფედერაციის პრეზიდენტს დიდიე ბურკჰალტერს შეხვდა. შეხვედრას საქართველოს ეკონომიკის მინისტრი გიორგი კვირიკაშვილი, საგარეო საქმეთა მინისტრი მაია ფანჯიკიძე და საქართველოს ელჩი შვეიცარიაში ირაკლი ყურაშვილი დაესწრნენ.
შეხვედრაზე მხარეებმა ორ ქვეყანას შორის არსებული ურთიერთობა განიხილეს. საუბარი შეეხო ეკონომიკური თანამშრომლობის საკითხებს. ორივე მხრიდან გამოითქვა მზადყოფნა ამ ურთიერთობის კიდევ უფრო გაღრმავებისთვის.
ირაკლი ღარიბაშვილმა შვეიცარიის კონფედერაციის პრეზიდენტს საქართველოს სუვერენიტეტისა და ტერიტორიული მთლიანობის პოლიტიკური მხარდაჭერისა და ამ საკითხებზე ურყევი პოზიციისათვის, ასევე შვეიცარიის შუამდგომლობისათვის საქართველო-რუსეთის ურთიერთობაში, საქართველოსათვის შვეიცარიის განვითარებისა და თანამშრომლობის სააგენტოს მიერ გაწეული ტექნიკური თანამშრომლობისა და ჰუმანიტარული დახმარებისათვის მადლობა გადაუხადა.
