საქართველო, 22 იანვარი, საქინფორმი. 2013 წლის 29 დეკემბერს საკრებულოს სხდომაზე მერიის მიერ წარმოდგენილი 2014 წლის ბიუჯეტი ჩავარდა. ეს იყო პირველი პრეცედენტი უკანასკნელი წლების მანძილზე, როცა მერიის მიერ შემუშავებული პროექტი საკრებულომ არ დაამტკიცა. მერიაში ამ ფაქტმა უკმაყოფილება გამოიწვია.

იმისათვის, რომ თბილისისა და თბილისელების სასარგებლოდ მოხდეს შეთანხმება და დამტკიცდეს 2014 წლის ბიუჯეტი, აუცილებელია მერია და საკრებულო შეთანხმდნენ ბიუჯეტის პროექტის კომპრომისულ ვარიანტზე.

სწორედ ამ მიზნით, საკრებულოს ოპოზიციონერმა დეპუტატებმა კახა კუკავამ და მამუკა კაციტაძემ მერის მოვალეობის შემსრულებელს, ქალბატონ სევდია უგრეხელიძეს თბილისის ბიუჯეტზე საკუთარი წინადადებები წარუდგინეს.