საქართველო, 17 იანვარი, საქინფორმი. გუშინ საქართველოს პრემიერ–მინისტრი სამხრეთ კავკასიაში მსოფლიო ბანკის რეგიონულ დირექტორს ჰენრი კერალს შეხვდა. შეხვედრაზე მხარეებმა საქართველოსა და მსოფლიო ბანკის თანამშრომლობის საკითხები განიხილეს  და სამოქმედო პრიორიტეტები განსაზღვრეს. ირაკლი ღარიბაშვილმა მადლობა გადაუხადა ჰენრი კერალს თანამშრომლობისთვის და პარტნიორული ურთიერთობის კიდევ უფრო გაღრმავების იმედი გამოთქვა.

მთავრობის კანცელარიაში გამართულ შეხვედრას მსოფლიო ბანკის წარმომადგენლები და საქართველოს ფინანსთა მინისტრი დაესწრნენ.

გუშინვე საქართველოს პრემიერ–მინისტრი ვენეციის კომისიის პრეზიდენტს შეხვდა. ვენეციის კომისიის დელეგაცია საქართველოში ორდღიანი ვიზიტით იმყოფება. დელეგაციის შემადგენლობაში არიან ვენეციის კომისიის პრეზიდენტი ჯანი ბუკიკიო და კომისიის მდივანი ტომას მარკერტი. 

ირაკლი ღარიბაშვილის შეხვედრა ჯანი ბუკიკიოსთან მთავრობის კანცელარიაში შედგა. მხარეებმა ქვეყანაში მიმდინარე პოლიტიკურ–სამართლებრივ პროცესებზე და მიმდინარე რეფორმებზე ისაუბრეს. საუბარი ასევე შეეხო  საკანონმდებლო ცვლილებებს.