საქართველო, 14 იანვარი, საქინფორმი. საქართველოს შეიარაღებული ძალების  მე-5 ქვეით ბრიგადაში 2013 წლისთვის გათვალისწინებული ყველა სამშენებლო სამუშაო დასრულებულია. გორში, მე-5 ბრიგადაში დასრულებული სამუშაოების დასათვალიერებლად თავდაცვის მინისტრი ირაკლი ალასანია და გენერალური შტაბის უფროსი, გენერალ-მაიორი ვახტანგ კაპანაძე იმყოფებოდნენ. პირველად მათ ბრიგადის პოლიგონი მოინახულეს. ადგილზე აშენდა და გარემონტდა სასროლეთის მართვის ცენტრი, საშხაპეებითა და საკლასო ოთახებით.

მე-5 ქვეით ბრიგადაში განხორციელებული სამშენებლო სამუშაოების პირველ ეტაპზე აშენდა 51-ე ბატალიონის ერთი სასადილო, რომელიც უახლესი, თანამედროვე ტექნოლოგიებით არის აღჭურვილი. დასრულდა ბატალიონის ტერიტორიაზე მდებარე შენობა-ნაგებობებში კომუნიკაციების - გათბობის, წყალმომარაგებისა და კანალიზაციის გაყვანა. ამჟამად მათი კეთილმოწყობის სამუშაოები მიმდინარეობს. მე-5 ბრიგადის შტაბის ტერიტორიაზე რეაბილიტაცია ჩაუტარდა სასადილოს. დასრულდა საკონტროლო გამშვები პუნქტის მშენებლობაც.