საქართველო, 30 დეკემბერი, საქინფორმი. საქართველოს თავდაცვის მინისტრმა პარლამენტის თავდაცვისა და უშიშროების კომიტეტის წევრებს წლის შემაჯამებელი ფინანსური ანგარიში წარუდგინა. ანგარიშის წარდგენისას ირაკლი ალასანიამ განსაკუთრებული ყურადღება გაამახვილა საპარლამენტო ზედამხედველობის გაზრდასა და უწყების ფინანსურ გამჭვირვალობაზე.

2013 წელს საქართველოს კანონში ,,თავდაცვის შესახებ” შევიდა ცვლილება, რომლის თანახმად სამინისტრო ვალდებულია საქართველოს პარლამენტის თავდაცვისა და უშიშროების კომიტეტს წარუდგინოს ინფორმაცია განსახორციელებელი სახელმწიფო შესყიდვების შესახებ, თუ შესასყიდი საქონლის ან მომსახურების სავარაუდო ღირებულება აღემატება 2,000,000 ლარს, ხოლო შესასყიდი სამშენებლო სამუშაოს სავარაუდო ღირებულება - 4,000,000 ლარს.

მიმდინარე წლის განმავლობაში თავდაცვის სამინისტროს ერთ-ერთი მთავარი ამოცანა  შესყიდვების პროცედურების დახვეწა და  მაქსიმალური ტრანსპარენტულობის მიღწევა იყო. 2013 წლის განმავლობაში სულ 1 010 კონტრაქტი გაფორმდა, რომელთა საერთო ღირებულებამ 167,826,000 ლარი შეადგინა.