სამართალი
უგულავა: „ასეთი რამ გააკეთა სტალინმა, როცა მოლოტოვი ჰაერში გადააყენა“
საქართველო, 23 დეკემბერი, საქინფორმი. თბილისის მერიას გიგი უგულავას თანამდებობიდან გადაყენების შესახებ საქალაქო სასამართლოს განჩინება ჩაბარდა. მერის მოადგილე ირაკლი აბესაძის განცხადებით, მერიისთვის გაუგებარია, რომელი კანონის საფუძველზე უნდა მოხდეს განჩინების აღსრულება.
„თბილისის მერი არჩეულია საყოველთაოდ, პირდაპირი არჩევნების გზით. იგი თანამდებობაზე გამწესებულია ხალხის გადაწყვეტილებით. ჩვენთვის გაურკვეველია, თუ როგორ უნდა მოხდეს თბილისის მერის გადაყენება. უნდა შეუჩერდეს უფლებამოსილება თუ საერთოდ უნდა ჩამოშორდეს თანამდებობას. სავარაუდოდ, ეს გაურკვეველი იყო, მათ შორის, მოსამართლისთვისაც", - აღნიშნა აბესაძემ და დასძინა, რომ გადაწყვეტილების აღსრულებამდე თბილისის მერი ფორმალურად თანამდებობაზე რჩება.
საქინფორმის მკითხველს შევახსენებთ, რომ გიგი უგულავას თბილისის საქალაქო სასამართლომ 22 დეკემბრის ღამეს უფლებამოსილება შეუჩერა.
უფლებაშეჩერებული მერი კი სამართლებრივი ბრძოლის გაგრძელებას აპირებს და სასამართლოს გადაწყვეტილებას სტალინის მიერ მოლოტოვის გადაყენებას ადარებს.„ასეთი რამ გააკეთა სტალინმა, როცა მოლოტოვი ჰაერში გადააყენა და მეორე შემთხვევა ვარ მე, როდესაც არც გეკითხებიან, არც იმის უფლებას გაძლევენ, რომ შენი პოზიცია დაიცვა, ელემენტარულად, შენი არგუმენტი წამოაყენო და ასე, ფოსტით იგებ გადაწყვეტილებას, რომ უფლებამოსილება ან შეჩერებული გაქვს, ან ხარ გადაყენებული. ამას გზადაგზა გავარკვევთ“, - განაცხადა გიგი უგულავამ.
