საქართველო, 23 დეკემბერი, საქინფორმი. პრემიერ–მინისტრმა ირაკლი ღარიბაშვილმა მეუღლესთან ერთად საქართველოში აკრედიტებული დიპლომატიური კორპუსის წარმომადგენლებს უმასპინძლა. მიღებას დაესწრნენ საქართველოს მთავრობის წევრებიც.

ირაკლი ღარიბაშვილმა შეკრებილ სტუმრებს სიტყვით მიმართა და თანამშრომლობისთვის მადლობა გადაუხადა: „მოხარული ვარ, რომ დღეს მაქვს შესაძლებლობა, მივმართო ესოდენ პატივცემულ საზოგადოებას. ჩემი დანიშვნის შემდეგ ეს არის დიპლომატიურ კორპუსთან ჩვენი პირველი შეხვედრა. იმედი მაქვს, რომ კიდევ ბევრჯერ მოგვეცემა აზრთა გაცვლა-გამოცვლისა და მნიშვნელოვან საკითხებზე მსჯელობის საშუალება.

ყველა, ვინც იცნობს საქართველოს უახლეს ისტორიას, აცნობიერებს საერთაშორისო თანამეგობრობის, კონკრეტულად კი - მეგობარი ქვეყნების დიპლომატების განსაკუთრებულ როლს ჩვენი არცთუ ისე შორეული წარსულის კრიტიკულ მომენტებში, რომელსაც ჩვენი ქვეყნისთვის სასიცოცხლო მნიშვნელობა ჰქონდა.

პატივცემულო ელჩებო, გარწმუნებთ, რომ ყოველთვის დაფასებული იქნება თქვენი როლი და ჩართულობა დემოკრატიის, კანონის უზენაესობისა და ჩვენი მოქალაქეების კეთილდღეობის უზრუნველყოფის საქმეში, რომლისთვისაც ჩვენ ძალისხმევას არ ვიშურებთ.

კიდევ ერთხელ მინდა გადაგიხადოთ მადლობა საქართველოს მთავრობისა და საქართველოს მოქალაქეთა სახელით თქვენი მხარდაჭერის, დახმარებისა და თანადგომისათვის.

2014 წელი უკვე მოახლოვდა. გილოცავთ ახალი წლის დადგომას და გისურვებთ წარმატებებს თქვენს საქმიანობაში ჩვენს ქვეყნებს შორის მეგობრობის განსამტკიცებლად”, – განაცხადა სიტყვით გამოსვლისას საქართველოს პრემიერ–მინისტრმა.