საქართველო, 13 დეკემბერი, საქინფორმი. აშშ-ში ვიზიტის ფარგლებში თავდაცვის მინისტრის მოადგილე მიხეილ დარჩიაშვილმა აშშ-ის ნატოს საპარლამენტო ასამბლეის დელეგაციის წევრს, კონგრესმენ ჯონ შიმკუსსა და  წარმომადგენელთა პალატის საგარეო საქმეთა კომიტეტის წევრს, კონგრესმენ ტედ დოიჩს საქართველოსა და რეგიონში უსაფრთხოების თვალსაზრისით არსებული ვითარება გააცნო. მხარეებმა საქართველოს ნატოსა და ევროკავშირში გაწევრიანების პერსპექტივები განიხილეს.

მნიშვნელოვანი აქცენტი გაკეთდა თავდაცვის სფეროში მიმდინარე ტრანსფორმაციის პროცესზე, მიღწეულ პროგრესსა და ნატოს ეგიდით ავღანეთში მიმდინარე ISAF-ის ოპერაციაში საქართველოს კონტრიბუციაზე. ამერიკელმა კონგრესმენებმა საქართველოს ტერიტორიული მთლიანობისა და სუვერენიტეტის, ასევე ქვეყნის ნატოში გაწევრიანების მიმართ ურყევი მხარდაჭერა გამოხატეს. მათ ქართულ მხარეს ISAF-ის ოპერაციაში შეტანილი წვლილისა და პოსტ-ISAF-ის მისიაში სამომავლო თანამშრომლობისთვის მადლობა გადაუხადეს.