საქართველო, 8 ნოემბერი, საქინფორმი. ორგანიზაცია „ახალგაზრდა ადვოკატები“ საქართველოს მთავარ პროკურატურაში ცვლილებებს ეხმაურება და იმედს გამოთქვამს, რომ საქართველოს ახალი პრემიერ–მინისტრის მიერ დანიშნული ახალი მთავარი პროკურორი გააგრძელებს სისტემის რეფორმირებას, მეორე მხრივ კი, ეფექტიანი გადაწყვეტილებებით ხელს შეუწყობს ქვეყანაში სამართლიანობის აღდგენის პროცესს.

„ახალგაზრდა ადვოკატებმა“ 2013 წლის 14 სექტემბერს განცხადებით მიმართა საქართველოს მთავარ პროკურატურას და განხორციელებული საქმიანობის სტატისტიკა მოითხოვა.

„ახალგაზრდა ადვოკატებს“, 2013 წლის 1 ოქტომბერს, საქართველოს მთავარმა პროკურატურამ დასმულ საკითხებზე შემდეგი სახის საჯარო ინფორმაცია მიაწოდა:

“საქართველოს იუსტიციის სამინისტროს საქმისწარმოების სამმართველოს ელექტრონული პროგრამის მონაცემების თანახმად, საქართველოს მთავარ პროკურატურაში 2012 წლის 1 ოქტომბრიდან 2013 წლის 15 სექტემბრის ჩათვლით, დარეგისტრირებულია 48662 წერილი, ხოლო 2011 წლის 1 ოქტომბრიდან 2012 წლის 1 ოქტომბრის ჩათვლით - 20739 წერილი. ასევე გაცნობებთ, რომ 2012 წლის 1 ოქტომბრიდან 2013 წლის 15 სექტემბრის ჩათვლით, პროკურატურის სისტემიდან დათხოვნილია 92 მუშაკი, მათ შორის: 58 პროკურორი, 6 გამომძიებელი და 28 სხვა მუშაკი. მითითებულ პერიოდში დაინიშნა 322 მუშაკი, მათ შორის: 151 პროკურორი, 49 გამომძიებელი, 49 სტაჟიორი და 73 სხვა მუშაკი”.