საზოგადოება
მერაბიშვილი: „მავრმა თავისი საქმე გააკეთა, მავრს შეუძლია წავიდეს!“
საქართველო, 8 ნოემბერი, საქინფორმი. ქუთაისში ჩემი ტარება ყოველდღე არის, როგორც მინიმუმ, წამების მცდელობა. თქვენ იცით, რომ მე ვერ შევძლებ ყოველდღე აქ სიარულს, ეს კი იმისთვის ხდება, რომ საზოგადოებას არ მიაწოდოთ ჩემი სიმართლე, - ეს განცხადება ვანო მერაბიშვილმა სასამართლო პროცესზე გააკეთა, სადაც, მოსამართლის განცხადებით, მომდევნო კვირიდან საქმის განხილვა ყოველდღე გაიმართება.
დღევანდელ სხდომაზე პროკურატურამ მოწმეების სახით წარმოადგინა ჯანდაცვის სამინისტროს სოციალური მომსახურების სააგენტოს ყოფილი თანამდებობის პირები, რომლებმაც განაცხადეს, რომ არანაირი უკანონო პირდაპირი ან ირიბი დავალება ვანო მერაბიშვილისგან ან ზურაბ ჭიაბერაშვილისგან არ მიუღიათ.
„ნაციონალური მოძრაობის" გენერალური მდივანი დღეს მთავარი პროკურორის თანამდებობიდან არჩილ კბილაშვილის გადადგომასაც გამოეხმაურა.
„უკანასკნელი 1 წლის განმავლობაში პროკურატურა ივანიშვილის პირად დავალებებს ასრულებს, რაც გულისხმობს პოლიტიკური ოპონენტების განადგურებას, ალტერნატიული აზრის მოსპობას, "ერთიანი ნაციონალური მოძრაობის" დაშლას... მისი საქმიანობა მოკლედ შეიძლება, შეფასდეს - რომ იგი იყო ოპონენტების ჯალათი და ჯალათების ადვოკატი. მავრმა თავისი საქმე გააკეთა, მავრს შეუძლია, წავიდეს", - განაცხადა მერაბიშვილმა.
