საზოგადოება
პავლე კუბლაშვილი: „ქართული ოცნება“ ცდილობს, ადგილობრივ არჩევნებამდე მერია დაასუსტოს“
საქართველო, 30 ოქტომბერი, საქინფორმი. დედაქალაქის მერს, შესაძლოა, უფლებამოსილება შეეზღუდოს. კანონპროექტი, რომლის მიხედვითაც თბილისის მერს უფლებამოსილება ეზღუდება, თუმცა ფუნქციები ემატება საკრებულოს, პარლამენტში დღეს შევიდა. ინიციატივის ავტორები გია ჟორჟოლიანი და ირაკლი ტრიპოლსკი არიან.
კანონში შესატანი ცვლილებების დამტკიცების შემთხვევაში ვიცე–მერს, სამსახურის უფროსებს და გამგებლებს საკრებულო დანიშნავს. ასევე, საკრებულოს ექნება უფლება, რომ თანამდებობაზე მყოფი პირები გადააყენოს და გამოუცხადოს უნდობლობა, რასაც უმრავლესობის 1/3 სჭირდება. იმ შემთხვევაში, თუ თბილისის მერი და საკრებულო რამდენჯერმე ვერ შეთანხმდნენ, თბილისის მერს აქვს უფლება, დამოუკიდებლად მიიღოს გადაწყვეტილება, თუმცა ის თანამდებობაზე ვერ დანიშნავს საკრებულოს მიერ დაწუნებულ კანდიდატს.თბილისის მერის უფლებამოსილების შეზღუდვას საპარლამენტო უმცირესობის წევრები ეწინააღმდეგებიან.
„ეს არის ირაკლი შიხიაშვილის, „ქართული ოცნების“ ბრძოლა მეტი ძალაუფლებისათვის დედაქალაქში. მათ საგანგაშოდ ეჩვენებათ ის, რომ 20%–მა „ნაციონალურ მოძრაობას“ დაუჭირა მხარი და ცდილობენ, რომ ადგილობრივ არჩევნებამდე კიდეფ უფრო დაასუსტონ მერია“, – აღნიშნა „ნაციონალური მოძრაობის“ წევრმა პავლე კუბლაშვილმა.
