საქართველო, 29 ოქტომბერი, საქინფორმი. ნინო ბურჯანაძე ახალ მიმართვას აქვეყნებს. სადაც, კერძოდ, ნათქვამია:

„ფაქტია, რომ ამომრჩეველთა უმრავლესობამ ხმა მისცა „ქართული ოცნების“, უფრო სწორად, ბიძინა ივანიშვილის კანდიდატს.

27 ოქტომბრის საპრეზიდენტო არჩევნები იყო განუზომლად უფრო თავისუფალი, ვიდრე წინა არჩევნები. თუმცა, მიუხედავად დაპირებებისა და ჩვენი მოლოდინისა, ის არ იყო არც სამართლიანი, არც თანასწორი და ნამდვილად შორს იყო რეალური ევროპული სტანდარტებისაგან, ვინაიდან ეს არჩევნები ჩატარდა „ნაციონალური მოძრაობის“ მიერ წლების მანძილზე ჩამოყალიბებული და აპრობირებული უსამართლო საარჩევნო სისტემით, რომელსაც წლების განმავლობაში აკრიტიკებდა „ქართულ ოცნებაში“ შემავალი ყველა პოლიტიკური პარტია.

გუშინდელმა დღემ ნათლად დაგვანახვა ყველას, მთელ საქართველოს, რომ დღეს ჩვენ კოჰაბიტაციის ნაცვლად უკვე მივიღეთ რეალურად მჭიდრო თანამშრომლობა ორ დიდ სახელისუფლებო ძალას შორის. ეს არის იმის შედეგი, რომ „ქართულ ოცნებასა“ და „ნაციონალურ მოძრაობას“ შორის მოხდა სამარცხვინო და ცინიკური გარიგება. უნდა აღვნიშნო, რომ ეს შედეგები ნამდვილად არ ამართლებს ადამიანების მოლოდინს, რომლებმაც პირველ ოქტომბერს ხმა მისცეს „ქართულ ოცნებას“.

ჩვენ მივიღეთ ერთი პოლიტიკური ძალის მიერ ხელისუფლების მონოპოლიზაცია და დღეიდან სწორედ მას ეკისრება მთელი პასუხისმგებლობა ქვეყანის მომავალზე.