საქართველო, 22 ოქტომბერი, საქინფორმი. კოალიცია „ქართული ოცნების“ პრეზიდენტობის კანდიდატმა წინასაარჩევნო კამპანიის ფარგლებში „შერატონ მეტეხი პალასში“ სპორტის ფედერაციების ხელმძღვანელებთან და სპორტსმენებთან შეხვედრა გამართა. გიორგი მარგველაშვილი სპორტსმენებს ლერი ხაბელოვმა, შოთა ხაბარელმა და სპორტისა და ახალგაზრდობის მინისტრმა ლევან ყიფიანმა წარუდგინეს.

როგორც მარგველაშვილმა სიტყვით გამოსვლისას განაცხადა, "ჩვენ სპორტსმენებს არ გავხდით პოლიტიკური ბრძოლის იარაღად. ჩვენ არ გამოვიყენებთ სპორტსმენებს და მათ ავტორიტეტს ვინმესთვის ხელის გადასაგრეხად. ჩვენს მთავრობაში არავის მოსვლია თავში, რომ ზონდერ-ბრიგადებში ჩავსვათ და, შესაბამისად, ჩვენ გვერდით გვიდგას სპორტსმენების სახით ხალხი, რომლის პოლიტიზაციასაც არ ვაპირებთ. სპორტი არ იქნება პოლიტიზებული და ჩვენი მიზანია, რომ ეს იყოს მართლაც შეჯიბრი".

შეხვედრა კითხვა-პასუხის რეჟიმში მიმდინარეობდა. სპორტსმენებმა პრეზიდენტობის კანდიდატს მხარდაჭერა აღუთქვეს. როგორც საქართველოს ოლიმპიური კომიტეტის ვიცე-პრეზიდენტმა ნინო სალუქვაძემ განაცხადა, "ბევრი ადამიანი გიდგათ გვერდში, მათ შორის ჩემი სახით. თქვენ ორი და ათი ტურიც რომ დაგჭირდეთ, უარი არ უნდა თქვათ ამ ბრძოლაში ბოლომდე მონაწილეობაზე".