საქართველო, 22 ოქტომბერი, საქინფორმი. საქართველოს თავდაცვის მინისტრი და გაერთიანებული შტაბის უფროსი დაშავებულ სამხედრო მოსამსახურეებს შეხვდნენ. ირაკლი ალასანიამ 2008 წლის აგვისტოს ომში, სამშვიდობო მისიებსა და სამსახურებრივი მოვალეობის შესრულების დროს დაშავებულ სამხედრო მოსამსახურეებთან ერთად, სხვადასხვა ტიპის ცეცხლსასროლი იარაღიდან სროლაში მიიღო მონაწილეობა.

„გვქონდა სროლები ჩვენს მეომრებთან ერთად, რომლებიც სხვადასხვა საომარ მოქმედებაში - ავღანეთში, ერაყში, 2008 წელს დაიჭრნენ და ამპუტირებული აქვთ კიდურები. სამხედროები ძალიან ზუსტად ისვრიან. მათ იოტისოდენადაც არ განელებიათ პროფესიული თვისებები. დაჭრილი მეომრებისთვის სპეციალური პროგრამა შევქმენით. ამ პროგრამის მიხედვით, უახლოეს პერიოდში მათ ამერიკის შეერთებულ შტატებში გავაგზავნით, სადაც კიდურების აღდგენის კუთხით ყველაზე კვალიფიციურ, ყველაზე მაღალტექნოლოგიურ მხარდაჭერას მიიღებენ“, - აღნიშნა ირაკლი ალასანიამ.

სამხედრო მოსამსახურეები პროთეზირების პროგრამას ამერიკულ კლინიკაში ქართული მხარის ორგანიზებით გაივლიან. მათ მექანიკურ კიდურებს მიკრო ბიოპროცესორიანი პროთეზით შეუცვლიან. უახლესი თაობის ელექტროკიდური სამხედრო მოსამსახურეებს რთულ რელიეფზე გადაადგილებას გაუადვილებს. წყალში, მტვერში, თოვლსა და ყინვაში გამძლე ახალი პროთეზი ჯარისკაცებს მეტი აქტიურობის საშუალებას მისცემს. რეაბილიტაციის კურსი ყველა სამხედროსთვის ინდივიდუალურია. სამშობლოში დაბრუნების შემდეგ ისინი საკუთარ ქვედანაყოფებს დაუბრუნდებიან და შეიარაღებულ ძალებში გააგრძელებენ სამსახურს.