საქართველო, 21 ოქტომბერი, საქინფორმი. ერთი წლის განმავლობაში საქართველოში არსებულ ყველა კონფესიის ობიექტს აზერბაიჯანული სახელმწიფო ნავთობკომპანია "სოკარი" უფასო ბუნებრივი აირით უზრუნველყოფს. შესაბამისი მემორანდუმი საქართველოს საპატრიარქოსა და „სოკარის“ წარმოადგენლებს შორის გაფორმდა.

შეხვედრას საპატრიარქოში ენერგეტიკის მინისტრი კახა კალაძე და "სოკარის" პრეზიდენტი როვნაგ აბდულაევი ესწრებოდნენ. მემორანდუმს ხელი მოაწერეს პატრიარქის ქორეპისკოპოსმა იაკობმა და როვნაგ აბდულაევმა.

კახა კალაძის განცხადებით, ერთი წლის განმავლობაში, 2013 წლის 1 ნოემბრიდან 2014 წლის 1 ნოემბრამდე, საქართველოში არსებულ ყველა კონფესიის ობიექტს ბუნებრივი აირი უფასოდ მიეწოდება, რისთვისაც მან მადლობა გადაუხადა "სოკარს" და, ასევე, საპატრიარქოს და უწმინდესს მიღებისათვის.