პოლიტიკა
თომას ჰამარბერგის ანგარიში საქართველოში ადამიანის უფლებათა მდგომარეობის შესახებ
საქართველო, 24 სექტემბერი, საქინფორმი. გუშინ, 2013 წლის 23 სექტემბერს, საქართველოს ხელისუფლება მიესალმა თომას ჰამარბერგის (ევროკავშირის სპეციალური მრჩეველი საქართველოშო საკონსტიტუციო და იურიდიული რეფორმებისა და ადამიანის უფლებათა საკითხებში) ანგარიშს, რომელსაც ესოდენ მოუთმენლად ელოდნენ. თამარ ჩუგოშვილმა (საქართველოს პრემიერ-მინისტრის მრჩეველი ადამიანის უფლებათა და გენდერულ საკითხებში) განაცხადა: „საქართველოს ხელისუფლება მიესალმება ამ ანგარიშს და მადლიერებას გამოხატავს ბატონი ჰამარბერგის მნიშვნელოვანი და დაუღალავი შრომის გამო. ხელისუფლება სრულად გაითვალისწინებს ბატონი ჰამარბერგის რეკომენდაციებს. ამ მიზნით ჩვენ შევიმუშავებთ ადამიანის უფლებათა ახალ სამოქმედო გეგმას. რეფორმების გაგრძელებისა და ევროკავშირსა და სხვა საერთაშორისო პარტნიორებთან თანამშრომლობის გზით საქართველო მალე მიაღწევს სრულ ინტეგრაციას ევროპასა და ევროატლანტიკურ სივრცეში“.
ანგარიშში აღნიშნულია მნიშვნელოვანი პროგრესი საქართველოში და მოცემულია კონკრეტული რეკომენდაციები დარჩენილი ხარვეზების გამოსწორებისათვის აუცილებელ შემდგომ ნაბიჯებთან დაკავშირებით. ანგარიშში მოწონებულია ხელისუფლების მიერ გადადგმული ნაბიჯები, რომლებიც მიმართულია მართლმსაჯულების სისტემის დამოუკიდებლობის ხელშეწყობის, მოსახლეობაში ადამიანის უფლებათა დაცვის დონის გაზრდის, დასაქმების სფეროში პროგრესული რეფორმების შემუშავების, აგრეთვე გამჭვირვალობისა და დაინტერესებულ მხარეებთან კონსულტაციების მასშტაბის გაზრდისა და წარსულში არსებული „ელიტარული კორუფციისა“ და დაუსჯელობის აღმოფხვრისაკენ.
ჰამარბერგის თანახმად,უკანასკნელ თვეებში საქართველომ შეძლო „გადაუჭრელი და რთული პრობლემების საკმაოდ დიდი რაოდენობის მოგვარება, მათ შორის, ისეთი პრობლემებისა, რომლებიც ეხება მართლმსაჯულების სისტემის მუშაობას“.
შეფასების დასასრულს ჰამარბერგი მოუწოდებს საერთაშორისო თანამეგობრობას, კერძოდ კი, ევროკავშირს, ქვეყნის დემოკრატიულ განვითარებაში მისი როლის შესრულების გაგრძელებისაკენ, რადგანაც „ევროპის ინტერესებში ცალსახად შედის საქართველოში დემოკრატიის განვითარება და შემდგომი განმტკიცება“. ნოემბერში იგეგმება ასოცირების შესახებ ხელშეკრულების პარაფირება საქართველოსა და ევროკავშირს შორის.
ანგარიშში ყურადღება ეთმობა 2012 წლის ოქტომბრის არჩევნების შემდეგ საქართველოში მიმდინარე რეფორმების მასშტაბებს. ეს პერიოდი ანგარიშში მოხსენებულია, როგორც 1991 წელს „დამოუკიდებლობის მოპოვების შემდეგ მეორე გარდამავალი პერიოდი“. ანგარიშში ასევე მოხსენებულია ზოგიერთი უაღრესად სათუთი საკითხი, ხელისუფლების მიერ სამართლიანობის აღდგენაზე გამიზნული ძალისხმევის ჩათვლით. „მნიშვნელოვანია დაუსჯელობასთან ბრძოლა, და ამ ბრძოლაში არცთუ ბოლო ადგილზეა სახელმწიფო მოხელეების მიერ ჩადენილი დანაშაულის წინააღმდეგ ბრძოლა“. ეს პროცესი, ჰამარბერგის თანახმად, უნდა გახდეს „სამართლის აღსრულების, სამართლიანობისა და გამჭვირვალობის მაგალითი“.
27 ოქტომბრის საპრეზიდენტო არჩევნებთან დაკავშირებით, რომელსაც ჰამარბერგი უწოდებს „ყველა ჩართული მხარის გამოცდას“, ანგარიშში აღნიშნულია, რომ „წინა არჩევნებთან შედარებით, გარემო ზოგადად უფრო მშვიდობიანია“, რომ „დღეს საქართველოს საზოგადოებას აქვს შედარებით თავისუფალი და პლურალისტული მედიაგარემო“ და რომ „შეკრების უფლება დღეს უკეთ არის დაცული“.
