საქართველო, 19 სექტემბერი, საქინფორმი. დიცში შექმნილი ვითარების განსახილველად საგარეო საქმეთა მინისტრი დიპლომატიური კორპუსის წარმომადგენლებს შეხვდება. მაია ფანჯიკიძე ელჩებს მწვავე საკითხებს დაწვრილებით გააცნობს. ამ თემას მინისტრი მთავრობის სხდომის დროს შეეხო. კომენტარი რეინტეგრაციის საკითხებში სახელმწიფო მინისტრმაც გააკეთა.

„მავთულხლართები გაიბმება. სამწუხაროდ და საუბედუროდ, ოკუპაცია გრძელდება. ტერიტორია უკვე წაგვართვეს. ოკუპაცია უკვე მოხდა. ან უნდა შევეგუოთ, ან თუ არ გინდათ, რომ შევეგუოთ, გეუბნებით, საგარეო საქმეთა სამინისტრომ გააკეთა განცხადება, შსს-მ გააკეთა განცხადება, ჩვენ ამ მიმართულებით ვმუშაობთ. როგორც სააკაშვილი ვერ უმკლავდებოდა რუსეთის ოკუპაციას, ისე ჩვენ ვერ ვუმკლავდებით. ჩვენი ამოცაანაა, რომ მავთულხლართებს ვუპასუხოთ მოსახლეობის ადგილზე დატოვების ფორმით", - განაცხადა პაატა ზაქარეშვილმა.

„აუცილებლად გაჟღერდება ეს თემა, რომელიც ნამდვილად ხელს უშლის კარასინი-აბაშიძის ფორმატის დადებით დინამიკას. დადებით დინამიკაში ვგულისხმობ იმ მიღწეულ შეთანხმებებს, რომლებიც ამ ფორმატის ფარგლებში გახდა შესაძლებელი“, - განაცხადა საგარეო უწყების ხელმძღვანელმა მაია ფანჯიკიძემ.