საქართველო, 2 სექტემბერი, საქინფორმი. კოალიცია „ქართული ოცნების“ პრეზიდენტობის კანდიდატი წინასაარჩევნო შეხვედრებს განაგრძობს. წინასაარჩევნო კამპანიის ფარგლებში გასულ შაბათს გიორგი მარგველაშვილი საჩხერის რაიონის მოსახლეობას შეხვდა.

შეხვედრას საქართველოს პრემიერ-მინისტრიც ესწრებოდა. სიტყვით გამოსვლისას ბიძინა ივანიშვილმა მმართველი გუნდის მიერ გაწეული სამუშაო შეაჯამა. მისი თქმით, ახალი ხელისუფლების მთავარი მიღწევა სამართლიანობის აღდგენის პროცესის დასაწყისი, ძალოვანი ორგანოების ხალხის სამსახურში ჩაყენება და საკონსტიტუციო ცვლილებებია. პრემიერმა პრეზიდენტობის კანდიდატზეც ილაპარაკა. მისი განცხადებით, ქვეყნის მასშტაბით ასობით გარემონტებული საჯარო სკოლა და მოსწავლეებისთვის სახელმძღვანელოების უფასოდ გადაცემა სწორედ გიორგი მარგველაშვილის დამსახურებაა.