აქტუალური
ახალციხელი მართლმადიდებლები ჭელაში მინარეთის დაბრუნებას აპროტესტებენ
საქართველო, 29 აგვისტო, საქინფორმი. ახალციხის მოსახლეობა სოფელ ჭელაში მინარეთის დაბრუნების შესახებ ხელისუფლების გადაწყვეტილების გასაპროტესტებლად სამხარეო პოლიციის შენობასთან დღეს დილიდან შეიკრიბა. დემონსტრანტები მინარეთის დაბრუნების წინააღმდეგ გამოდიან და ხელისუფლების გადაწყვეტილებას აპროტესტებენ. გზა გადაკეტილია. აქციის მონაწილეები აცხადებენ, რომ სოფელ ჭელაში მინარეთის დაბრუნებას არ დაუშვებენ. ისინი ასევე ამზადებენ საგანგებო მიმართვას, სადაც ჩაიწერება მოთხოვნა, რომ პარლამენტმა მიიღოს კანონი იმის ზუსტად განსასაზღვრად, თუ ვის რისი უფლება აქვს ამ ქვეყანაში. აქციის მონაწილეთა თქმით, ჭელაში მინარეთს აღმართვისას მუსლიმანებს ეგონათ, რომ ამის უფლება ჰქონდათ. თუმცა სინამდვილეში ამის უფლება არ აქვთ.
აქციაზე გამოჩნდნენ სამღვდელოებისა და ადგილობრივი თვითმმართველობის წარმომადგენლებიც, რომელთა განცხადებით, ისინი აქ დაძაბულობის თავიდან ასაცილებლად არიან. ამასთან, სამღვდელოების წარმომადგენლების განცხადებით, ისინი უერთდებიან აქციის მონაწილეების მოთხოვნას.
საქინფორმის მკითხველს შევახსენებთ, რომ ადიგენის რაიონის სოფელ ჭელაში მინარეთის დემონტაჟი 3 დღის წინ შემოსავლების სამსახურის გადაწყვეტილებით განხორციელდა. გუშინ ბათუმში, ილია ჭავჭავაძის ძეგლთან, ჭელიდან, წალკიდან და ხულოდან ჩასულმა მუსლიმებმა მინარეთის დაბრუნების მოთხოვნით საპროტესტო აქცია გამართეს. გვიან საღამოს კი ბათუმის მეჩეთში შეკრებილებს აჭარის მთავრობის თავმჯდომარე არჩილ ხაბაძემ აცნობა, რომ ხელისუფლების გადაწყვეტილებით, მინარეთს ადგილზე დააბრუნებენ. მისი დამონტაჟება დღეს საღამოს 7 საათამდე, ტექნიკური და იურიდიული პროცედურების გავლის შემდეგ არის დაგეგმილი.
