საქართველო, 28 აგვისტო, საქინფორმი. საქართველოს თავდაცვის სამინისტროს დელეგაცია ამერიკის შეერთებულ შტატებში ვიზიტს განაგრძობს. თავდაცვის მინისტრმა ირაკლი ალასანიამ და საქართველოს შეიარაღებული ძალების გაერთიანებული შტაბის უფროსმა, პოლკოვნიკმა ირაკლი ძნელაძემ შეხვედრა გამართეს გაეროს გენერალური მდივნის მოადგილესთან სამშვიდობო ოპერაციების დარგში ედმონდ მულეტთან.

განხილვის მთავარი თემა გაეროს ეგიდით მიმდინარე სამშვიდობო ოპერაციების სტატუსი და ამ ოპერაციებში ქართველი სამხედროების ჩართვა იყო.  „გაეროს წარმომადგენლების მხრიდან გამოთქმული იყო დაინტერესება, რომ ქართული ქვედანაყოფები, თავიანთი გამოცდილებიდან გამომდინარე,  ჩაერთონ გაეროს ეგიდით მიმდინარე სამშვიდობო ოპერაციებში. აღნიშნულთან დაკავშირებით, ჩვენი მისიის ხელმძღვანელობა გაეროში უკვე დეტალურად განიხილავს  მისიის დეტალებს“, - განაცხადა ირაკლი ძნელაძემ.

ქართული მხარე განიხილავს შესაძლებლობას, დამკვირვებლის სტატუსითა და  ასეულით გაეროს ეგიდით მიმდინარე სამშვიდობო ოპერაციებში მიიღოს მონაწილეობა. თუმცა, აუცილებელია ქართველი სამხედროების შესაბამისი გადამზადება და აღჭურვა. ამ მიზნით ქართული მხარე მზადყოფნას გამოთქვამს, კონსულტაციები დაიწყოს გაეროს სამშვიდობო ოპერაციების დეპარტამენტთან.

ანუ ამიერიდან ქართველი სამხედროები  არა მარტო ნატოს ISAF-ის ოპერაციაში ავღანეთში, არამედ გაეროს ეგიდით მიმდინარე ოპერაციებშიც მიიღებენ მონაწილეობას, მაგალითად - სირიაში, თუ ხვალ დაწყებული ომი მალე დამთავრდება და იქ გაეროს ცისფერჩაფხუტიანები შევლენ.