საქართველო, 26 აგვისტო, საქინფორმი. პოლიტიკური პარტია „ქართული ოცნება –დემოკრატიული საქართველოს“ აღმასრულებელმა მდივანმა არმაზ ახვლედიანმა ტელეკომპანია „მაესტროს“ საინფორმაციო გამოშვებაში მიმდინარე პოლიტიკური მოვლენები შეაფასა.

არმაზ ახვლედიანმა უარყო ბოლო დროს მედიაში გავრცელებული ინფორმაცია „ქართული ოცნების“ მხარდამჭერების ნინო ბურჯანაძის პარტიაში გადასვლის შესახებ და  კონკურენტების მხრიდან სასაცილო პოლიტიკური ტრიუკი უწოდა: „დღეს ის რეალობაა, როდესაც უამრავი ადამიანი უერთდება „ქართულ ოცნებას“! 1 ოქტომბრის შემდეგ დგება დრო, როდესაც საქართველო უნდა გადავიდეს თვისობრივად ახალ ეტაპზე, „ქართული ოცნება“ საპრეზიდენტო არჩევნებისთვის აქტიურად ემზადება და ამიტომ რაიმე გადინებაზე, მით უფრო მასობრივზე, ლაპარაკი ზედმეტია. ერთი წლის წინ მმართველი გუნდიდან გადასვლა იყო ღალატი და ქვეყნის დაქცევის ტოლფასი, დღეს ამაყი ვარ, რომ ორი წევრის გადასვლა არანაირ პრობლემას არ წარმოადგენს, ყველა თავისუფალია არჩევანში. „ქართული ოცნება“ და მისი ლიდერი ბიძინა ივანიშვილი აძლევენ ამის მაგალითს ჩვენს წევრებს“, – აღნიშნა ახვლედიანმა.

პარტიის აღმასრულებელმა მდივანმა, ასევე, ისაუბრა კოალიციის საპრეზიდენტო კანდიდატის შანსებზე  და გიორგი მარგველაშვილს საქართველოს კანდიდატი უწოდა: „პირველად საქართველოს უახლეს ისტორიაში ხდება ის, რომ თვისობრივად ახალი ტიპის, თანამედროვე, სამართლიან და არა ორმაგი სტანდარტებით მცხოვრებ და მოქმედ პიროვნებას აირჩევს საქართველო. სწორედ ასეთია ჩვენი კოალიციის კანდიდატი და ის არ არის მხოლოდ კოალიციის კანდიდატი, გიორგი მარგველაშვილი არის საქართველოს კანდიდატი. იმიტომ რომ საქართველო აკეთებს არჩევანს სამართლიანობის და მეტი დემოკრატიის სასარგებლოდ, აკეთებს არჩევანს იმის სასარგებლოს რომ ქართული პოლიტიკის ცენტრში დღეიდან, 1 ოქტომბრიდან  და მუდამ იყოს უმთავრესი ფასეულობა – ადამიანი,  და ადამიანის ირგვლივ იყოს მთელი პოლიტიკა. ასეთია „ქართული ოცნების“ არჩევანი 1 ოქტომბრიდან და ასეთი იქნება მანამ,  სანამ „ქართული ოცნება“ იქნება აქტიურ პოლიტიკაში“.