საქართველო, 23 აგვისტო, საქინფორმი. რეფერენდუმის ჩატარების საინიციატივო ჯგუფის ხელმძღვანელი ნანა კაკაბაძე ცენტრალური საარჩევნო კომისიის დადგენილებას უახლოეს დღეებში გაასაჩივრებს, - ამის შესახებ კაკაბაძემ ცესკო-დან მიღებული დადგენილების შემდეგ განაცხადა და აღნიშნულ გადაწყვეტილებას პოლიტიკური უწოდა. კაკაბაძის განმარტებით, ცესკო-ს დადგენილებაში მითითებული არგუმენტები ურთიერთგამომრიცხავიа, საინიციატივო ჯგუფის მოთხოვნა კი რეფერენდუმის ჩატარებასთან დაკავშირებით - კანონიერი და სამართლებრივად გამართლებულია. კაკაბაძის თქმით, დადგენილებაში მითითებულია, რომ რეფერენდუმი შეიძლება მოეწყოს მხოლოდ იმ განსაკუთრებით მნიშვნელოვან სახელმწიფოებრივ საკითხებზე, რომლებიც გათვალისწინებულია საქართველოს კონსტიტუციით, საქართველოს კანონებით ან საქართველოს საერთაშორისო ხელშეკრულებებითა და შეთანხმებით. ასევე დადგენილებაში აღნიშნულია, რომ რეფერენდუმის გზით მიღებული გადაწყვეტილების საფუძველზე საქართველოს პარლამენტის დათხოვნისა და რიგგარეშე არჩევნების დანიშვნის საკითხი არ არის გათვალისწინებული საქართველოს კონსტიტუციის შესაბამისად.

თავის მხრივ, ცესკო-ს მდივანმა გიზო მჭედლიძემ „ინფო 9“-სთან საუბრისას განმარტა, რომ ცესკო-ს დადგენილება სამართლიანია და მხოლოდ კანონით გათვალისწინებული ნორმების თანახმად დაიწერა.