საქართველო, 20 აგვისტო, საქინფორმი. ტელეკომპანია „მე-9 არხს“ მყიდველები გამოუჩნდნენ, - ამის შესახებ ტელეკომპანიის გენერალურმა დირექტორმა ლუბა ელიაშვილმა ცოტა ხნის წინ განაცხადა.

“არაერთი მსურველი გამოჩნდა როგორც “მე–9 არხის” ისე “ინფო–9″–ს ყიდვის. ყველაზე საინტერესო ის არის, რომ ინფო–9–ის შემთხვევაში ცდილობენ ბრენდის ყიდვას. უნდა გავიარო ამასთან დაკავშირებით კონსულტაცია, გუშინდელის შემდეგ დღეს ვაპირებდი დასვენებას, მაგრამ ვერ ვახერხებ, რადგან დროზე უნდა გავამზადოთ პაკეტები, როგორ და რა ტიპით შეიძლება გაიყიდოს ტელეკომპანია “მე–9 არხი” და “ინფო–9″. “მე–9 არხთან” დაკავშირებით ჯერჯერობით მხოლოდ ფასით ინტერესდებიან. იმედი მაქვს, არხი გაიყიდება”, – განაცხადა ლუბა ელიაშვილმა. აღსანიშნავია, რომ ამავდროულად სოციალურ ქსელ „ფეისბუქზე“ შეიქმნა ღია ჯგუფი „ვყიდულობთ მე-9 არხს და ვქმნით სააქციო საზოგადოებას“, რომლის ინიციატორი "მე-9 არხის" გენერალური დირექტორის ყოფილი მოადგილე, პუბლიცისტი ვასილ მაღლაფერიძეა. მისი განმარტებით, აღნიშნული საზოგადოების მიერ ტელევიზიის შესყიდვა „იქნება კარგი ნაბიჯი იმისკენ, რომ პრემიერი გათავისუფლდეს ტელევიზიისგან და კიდევ უფრო კარგი ნაბიჯი იქნება ჭეშმარიტად საზოგადოებრივი ტელევიზიის შესაქმნელად".

მაღლაფერიძის განცხადებით, რომლითაც იგი ელიაშვილის განცხადებას ახლახან ფეისბუქის აღნიშნულ გვერდზე გამოეხმაურა, როგორც კი საზოგადოებამ არხის შეძენის სურვილი გამოთქვა, მაშინვე არაერთი მყიდველი გამოჩნდა.