პოლიტიკა
ვლადიმერ პაპავა: „უნივერსიტეტის ბიუჯეტი არის რაციონალურად გამოსაყენებელი“
საქართველო, 19 აგვისტო, საქინფორმი. 16 აგვისტოს არჩევნების შედეგებით, ივანე ჯავახიშვილის სახელობის თბილისის სახელმწიფო უნივერსიტეტის ხელმძღვანელის პოსტი რიგით 28-ე რექტორმა ვლადიმერ პაპავამ დაიკავა. უნივერსიტეტის რექტორის არჩევნების საბოლოო შედეგები საზოგადოებას საარჩევნო კომისიის თავმჯდომარემ დავით ბოსტოღანაშვილმა გააცნო:„ხმები ასე გადანაწილდა: ვლადიმერ პაპავა - ათი ხმა, ირმა რატიანი - ორი ხმა. ალექსანდრე კვიტაშვილმა არჩევნებში მონაწილეობა არ მიიღო. სხვა კანდიდატებს არც ერთი ხმა არ მიუღიათ“.
რექტორის არჩევნებს უნივერსიტეტში რამდენიმე არასამთავრობო ორგანიზაცია აკვირდებოდა. ერთ-ერთი მათგანის, „ახალგაზრდა ადვოკატების“ ხელმძღვანელმა არჩილ კაიკაციშვილმა კენჭისყრის დასრულების შემდეგ რექტორის არჩევნებს გამჭვირვალე და ობიექტური უწოდა. „სადამკვირვებლო მისიამ დღევანდელი არჩევნები შეაფასა ობიექტურად, პროცესი იყო სამართლიანი და გამჭვირვალე, ჩვენთვის საჩივრით არავის მოუმართავს“, განაცხადა მან.
სამომავლო გეგმებსა და არჩევნების შედეგებზე კომენტარი თავად ლადო პაპავამაც გააკეთა:
"შესაცვლელი ბევრი რამეა, თუმცა პირველ რიგში უნივერსიტეტმა სტუდენტს საერთაშორისო დონის ადეკვატური ცოდნა უნდა მისცეს. კიდევ ცალკე მიმართულებაა, რომ უნივერსიტეტში სამეცნიერო კვლევა გაძლიერდეს და ამაში სტუდენტებიც ჩაერთონ. ასევე მიმაჩნია, რომ უნივერსიტეტის ბიუჯეტი არის რაციონალურად გამოსაყენებელი, ისე, რომ უნივერსიტეტის ყველა პროფესორს ჰქონდეს შესაბამისი ანაზღაურება“, - განაცხადა პაპავამ.
