საქართველო, 14 აგვისტო, საქინფორმი. მას შემდეგ, რაც პრეზიდენტმა სააკაშვილმა პრაქტიკულად ჩაშალა მიღება ამერიკულ ხომალდ BULKELEY–ზე, მან, „მოლაშქრეთა ეროვნული ფედერაციის" წარმომადგენლებთან ერთად, ორი დღის განმავლობაში ტობა ვარჩხილის ტბამდე 42 კილომეტრი ფეხით გაიარა. მიშამ მათთან ერთად ღამე ზღვის დონიდან 3 ათას მეტრზე ბანაკში, ქოხში გაათენა, რომელსაც დააწერა – „მიშა“. რატომ გადაწყვიტა სააკაშვილმა უცებ მთებში წასვლა – მთის ბილიკების შესწავლა და საველე პირობებში წვნიანის დამზადების სწავლა – უცნობია. ცნობილია მხოლოდ, რომ ხომალდზე მოწყობილი სკანდალის შემდეგ, რომელმაც აშშ–ის ელჩი შოკში ჩააგდო, ამერიკელებმა მას საბოლოოდ აქციეს ზურგი.

როგორც საქინფორმი იუწყებოდა, ამერიკულ გემზე, მთავარის გარდა, უმნიშვნელო ინციდენტიც მოხდა: პრემიერ–მინისტრი დაინტერესდა, რას ნიშნავს მიხეილ სააკაშვილის მკერდზე მიბნეული წითელი ყაყაჩო. „რა გიკეთია, რა გაქვს ეგ გულზე?!“ - ჰკითხა ბიძინა ივანიშვილმა.

„მოგიხერხებ, რომ იშოვო, – უპასუხა სააკაშვილმა, – ეს ჩვენი დაღუპული ჯარისკაცების ხსოვნის სიმბოლოა“.

ამასთან დაკავშირებით მკითხველი გრიგოლ გეგელია წერს: "წითელ ყაყაჩოს აქვს სრულიად კონკრეტული დატვირთვა. მისი ომის მსხვერპლთა მოსაგონრად ტარება აზრს იძენს მხოლოდ ერთი კონკრეტული - პირველი მსოფლიო ომის! - და არა ყველა ომის მსხვერპლთა მიმართ. ამიტომ წითელი ყაყაჩოს რუსულ-ქართული ომის მოსაგონრად ტარება, უბრალოდ, დიდი უაზრობაა“.