საქართველო, 12 აგვისტო, საქინფორმი. ორგანიზაცია „ახალგაზრდა ადვოკატები“ საქართველოს მთავრობას წეროვანის დევნილთა დასახლებაში არსებული პრობლემების მიმართ რეაგირებისკენ მოუწოდებს. ორგანიზაცია მოითხოვს, მოგვარდეს მოსახლეობის კომუნალურ მომსახურებაში არსებული ორი მთავარი პრობლემა – შესწავლილ იქნეს ბუნებრივი აირის მიმწოდებელი კომპანია „კასპი გაზის“ მიერ დაწესებული ტარიფის სამართლიანობა და პასუხი გაეცეს კითხვას, აპირებს თუ არა მთავრობა 2011 წლის მარტიდან შეწყვეტილი ბუნებრივი აირის ხარჯების დაფარვას. ამის შესახებ დღეს გამართულ ბრიფინგზე ორგანიზაციის იურისტმა ანა კიკნაძემ განაცხადა.

„ახალგაზრდა ადვოკატებმა“ წეროვანის დასახლებაში ადგილნაცვალ პირებთან შეხვედრის დროს მიიღეს ინფორმაცია, რომლის თანახმად, „კასპი გაზის“ მიერ ბუნებრივ აირზე დაწესებული ტარიფი ორჯერ აღემატება ყველა სხვა მუნიციპალიტეტში არსებულ ტარიფს. კომპანიამ არაერთ მოქალაქეს სასამართლოში უჩივლა, რათა კომუნალური დავალიანების გადახდა ამ გზით მომხდარიყო, მაგრამ გადახდისუუნარო ოჯახები დღემდე ვერ ახერხებენ დავალიანების დაფარვას. წეროვანის დასახლებაში კომუნალური დავალიანება 2011 წლიდან გაჩნდა, რა დროსაც სახელმწიფომ დევნილების სასარგებლოდ ბუნებრივი აირის ხარჯების დაფარვა შეწყვიტა. ადგილობრივი მცხოვრებლები დახმარებას ხელისუფლებას სთხოვენ. მართალია, ცოტა ხნის წინ იძულებით გადაადგილებულ პირთა, ლტოლვილთა და განსახლების სამინისტრო მათ ბუნებრივი აირის დანახარჯზე თებერვალსა და მარტში 50-50 ლარიან შეღავათს დაჰპირდა, თუმცა მარტში დარიგებულ ქვითრებზე არც ერთი ლარის შეღავათი არ დაფიქსირებულა. მოსახლეობის ინფორმაციით, კომპანია „კასპი გაზი“ მოსახლეობისთვის ახალ სანქციასაც აწესებს. კერძოდ, დავალიანების მქონე ოჯახები ყოველთვიურად 10–10 ლარით დაჯარიმდებიან.