საქართველო, 5 აგვისტო, საქინფორმი. რფ-ის პრემიერი დიმიტრი მედვედევი ტელერხ Russia today-სთან ინტერვიუში 2008 წლის აგვისტოს მოვლენებზე საუბრისას ირწმუნება, რომ 2008 წლის აგვისტოში რუსეთის მიზანი არ იყო მიხეილ სააკაშვილის დამხობა ან დასჯა, არამედ რუსეთის მიზანი იყო “კავკასიაში მშვიდობის დასამყარებელი ოპერაციის” ჩატარება. მისივე თქმით, სააკაშვილის ბედი ქართველ ხალხს უნდა გადაეწყვიტა და არა რუსეთს.
“ჩვენი მიზანი არ ყოფილა რეჟიმის შეცვლა, მიუხედავად იმისა, რომ ბატონი სააკაშვილი გასაგები მიზეზების გამო ჩემთვის და ჩემი კოლეგებისთვის აბსოლუტურად მიუღებელი პიროვნებაა. მე მას სამხედრო დამნაშავედ მივიჩნევ, თუმცა, ჩვენ ვთვლიდით და ვთვლით, რომ ხალხმა უნდა გაარკვიოს ურთიერთობები თავის ხელმძღვანელობასთან. მე არასდროს მიმიცია თბილისში შესვლის, პოლიტიკური რეჟიმის შეცვლის და სააკაშვილის დასჯის ბრძანება იმიტომ, რომ ჩვენ არ ვებრძოდით ქართველ ხალხს”, - განაცხადა მედვედევმა. მან კიდევ ერთხელ დაადანაშაულა ქართული მხარე ცხინვალზე თავდასხმაში და აღნიშნა, რომ რუსეთმა მხოლოდ ამ თავდასხმის შემდეგ მიიღო გადაწყვეტილება, დაეწყო სამხედრო ოპერაცია.

მისივე განცხადებით, ეს იყო რთული გადაწყვეტილება.
“მახსენდება, როგორ ვსაუბრობდი ვლადიმერ პუტინთან, როდესაც ქუჩაში ვსეირნობდით. მე მას ვუთხარი, რომ ასეთი გადაწყვეტილება მივიღე. მან მიპასუხა, რომ ისიც სწორად მიიჩნევს ასეთ გადაწყვეტილებას, მიუხედავად იმისა, რომ ცოტა ხნის წინ ეს ძალიან რთული იყო. მასთან საუბრის შემდეგ მე მოვიწვიე უშიშროების საბჭო, სადაც ვთქვი, რომ მიზანშეწონილად მივიჩნევ მივიღო აფხაზეთის და სამხრეთ ოსეთის აღიარების გადაწყვეტილება. უშიშროების საბჭოდან კოლეგებმა მხარი დამიჭირეს”, - განაცხადა მედვედევმა.

რუსეთის პრემიერის თქმით, საქართველოს პრეზიდენტ მიხეილ სააკაშვილს ჰქონდა სტრატეგიული გათვლა ქვეყნის ტერიტორიული მთლიანობის აღდგენასთან დაკავშირებით.
“დიდი ალბათობით, ბატონი სააკაშვილი იმყოფებოდა ილუზიაში, რომ რუსეთში პრეზიდენტის შეცვლის შემდეგ შეიძლება შეეცადოს მშვიდად მიაღწიოს იმ მიზნებს, რომელთა მიღწევა ვერც მან და ვერც მისმა წინამორბედებმა ვერ შეძლეს წინა წლებში. ჩემი აზრით, თავისი როლი ითამაშა იმ პირდაპირმა მხარდაჭერამ, რომელსაც სააკაშვილის მიმართ ადგილი ჰქონდა ამერიკის შეერთებული შტატების და ზოგიერთი სხვა ქვეყნის მხრიდან. ეს მხარდაჭერა კი იყო არა მხოლოდ მორალური, არამედ მატერიალურიც”, - განაცხადა მედვედევმა.

ამასთან, მედვედევმა აღნიშნა, რომ რუსეთი მზად არის აღადგინოს დიპლომატიური ურთიერთობა საქართველოსთან, მხოლოდ იმ პირობით, თუ ქართული მხარე 2008 წლის აგვისტოში მომხდარ ფაქტს აღიარებს.