საქართველო, 31 ივლისი, საქინფორმი. ბიძინა ივანიშვილი პრემიერის თანამდებობიდან ახალ წლამდე გადადგება. ამის შესახებ ბელგიური გამოცემა euobserver წერს, რომელმაც ინტერვიუ ბიძინა ივანიშვილთან ურეკის საზაფხულო რეზიდენციაში ჩაწერა. სტატიის ავტორი ენდრიუ რეტმენი აღნიშნავს, რომ  საქართველოს მილიარდერ პრემიერ-მინისტრს თავისი ქვეყნის მომავლისთვის ოცნება აქვს, მაგრამ ოპონენტები მას დემოკრატიისთვის შექმნილ საფრთხედ მიიჩნევენ. გამოცემის თანახმად, ივანიშვილს საქართველოს ტიპურ ევროპულ საზოგადოებად და დუბაის მსგავს ბიზნესცენტრად გარდაქმნა სურს. „ეს ჩემი ოცნებაა. ამის შესაძლებლობა არსეობს, თუკი ყველაფერი იდეალურად განვითარდება. რა თქმა უნდა, ამის ძალიან ხმამაღლა თქმა არ მინდა, რომ ვიღაცას არ გაეცინოს, მაგრამ გულის სიღრმეში მჯერა, რომ ამის შესაძლებლობა არის“, - აცხადებს ივანიშვილი ინტერვიუში.

ამავე სტატიაში ბიძინა ივანიშვილის განცხადებაზე კომენტარს გიგა ბოკერიაც აკეთებს. უშიშროების საბჭოს მდივანი ფიქრობს, რომ პრემიერის გადადგომის შემდეგ  იგი მთავრობას კულისებიდან უხელმძღვანელებს. ბოკერიას თქმით, ივანიშვილს სურს ჰყავდეს მარიონეტული მთავრობა ბევრი სუსტი პოლიტიკური პარტიით, რაც მას დაუმარცხებელს გახდის.

ბიძინა ივანიშვილის პრემიერობიდან წასვლის შესახებ კომენტარი გააკეთა პრეზიდენტობის კანდიდატმა გიორგი მარგველაშვილმა და განაცხადა, რომ „პრემიერი არ მიდის პოლიტიკიდან, ის მიდის თანამდებობიდან“.