საქართველო, 25 ივლისი, საქინფორმი. 23 ივლისს საქართველოს სოფლის მეურნეობის ყოფილი მინისტრი დავით კირვალიძე ე.წ. მოდულის შენობაში, შსს-ს ანტიკორუფციულ დეპარტამენტში კვლავ დაკითხვაზე იმყოფებოდა, რომელმაც 5 საათს გასტანა.

"წინასწარ არ ვიცი, კონკრეტულად რაზე ვარ დაბარებული, თუმცა, სავარაუდოდ, გავივლით იმ საკითხებს, რომელთა გავლაც გუშინ ვერ მოესწრო", - განაცხადა კირვალიძემ დაკითხვაზე შესვლამდე. მოდულის შენობიდან გამოსული კირვალიძის თქმით, მან ყველა კითხვას ამომწურავად გასცა პასუხი, ხოლო „თუ კიდევ გახდება საჭირო ჩემი დაკითხვა, ისევ გავცემ პასუხებს, ეს გამოძიებაზეა დამოკიდებული“.

შსს-ს მიერ 23 ივლისს გავრცელებული განცხადების მიხედვით, კომპანია ZETOR-ის  საქართველოს წარმომადგენლობის მენეჯერს, ბრალდებულ გივი ქაიხოსროშვილს ახალი ბრალდება წარედგინა - ორგანიზებული ჯგუფის მიერ დიდი ოდენობით საბიუჯეტო სახსრების გაფლანგვაში წაქეზების, სამსახურებრივი უფლებამოსილების ბოროტად გამოყენების წაქეზების, მტკიცებულებათა ფალსიფიკაციისა და ექსპერტებზე ზემოქმედების განხორციელებისათვის. საგამოძიებო ექსპერიმენტის შედეგად: „ZETOR PROXIMA POWER 120“ მარკისა და „NEW HOLLAND TD5 110“ მარკის ტრაქტორების ურთიერთშედარებით დადგინდა, რომ  ექსპერიმენტის ოთხივე კომპონენტში, რაც მოიცავდა საცდელი ხნულების 
გატარებას, მიწის მოხვნას, ხნულების სიღრმესა და მოხვნის დროს, „NEW HOLLAND TD5 110“ მარკის ტრაქტორმა მოიპოვა აბსოლუტური უპირატესობა.  „ZETOR PROXIMA POWER 120“ მარკის ტრაქტორი სწორედ ის მარკაა, რომლის  საქართველოს ბაზარზე შემოყვანას უკვე 2012 წლის ბოლოს ერთობლივად ლობირებდნენ სოფლის მეურნეობის სამინისტროს მაღალი თანამდებობის პირები და შპს „მექანიზატორის“ ხელმძღვანელები, ხოლო ჩეხური კომპანიის წარმომადგენლობას საქართველოში ხელმძღვანელობდა შპს „მექანიზატორის“ დირექტორთან - ვაჟა ნახუცრიშვილთან დაახლოებული პირი - ბრალდებული გივი ქაიხოსროშვილი.
ZETOR-ის გამარჯვების უზრუნველსაყოფად სწორედ ვაჟა ნახუცრიშვილმა და გივი ქაიხოსროშვილმა, ურთიერთშეთანხმებულად და მიზანმიმართულად შეაცვლევინეს ZETOR-ის სათავო ოფისის წარმომადგენლებს თავისუფალი წვდომის ინტერნეტ-რესურსზე გამოქვეყნებული მახასიათებლები და ხელოვნურად გააზრდევინეს ტრაქტორის ცხენის ძალა იმ ნიშნულამდე, რომელიც მინისტრის ბრძანებით შექმნილმა და ნდობით აღჭურვილი პირებით დაკომპლექტებულმა სამუშაო ჯგუფმა ZETOR-ის სასარგებლოდ მიზანმიმართულად განსაზღვრა.