საქართველო, 22 ივლისი, საქინფორმი. მარგვეთისა და უბისის ეპარქიის მრევლის ნაწილი მეუფე ვახტანგ ახვლედიანს უპირისპირდება. მათ გუშინ რეზიდენციის კარი აჭედეს და მეუფის ეკლესიიდან განკვეთა მოითხოვეს. მრევლი მიტროპოლიტს ეპარქიის ქონების - დაახლოებით მილიონი ლარის გაფლანგვაში ადანაშაულებს. მათი განცხადებით, უკვე მიაწოდეს ინფორმაცია საპატრიარქოს და პირობაც მიიღეს, რომ საკითხი საშემოდგომო სინოდის დროს განიხილება.

„მოვითხოვთ ერეტიკოსი მღვდელმთავრისა და ერეტიკოსი მღვდლების სჯულის კანონის მუხლებით დასჯას, რამეთუ ისინი ეკუმენურად, კათოლიკური აღმსარებლობის სტუმრებს უმასპინძლდებიან ნაკურთხი სეფისკვერით, რაც არის უდიდესი სჯულისმიერი დარღვევა, ამასთანავე, თვითმხილველთა მიერ ეპარქიის მმართველი დაფიქსირებულია ოჯახთან ერთად ცხოვრების წესში, რაც არის სჯულისმიერი დარღვევა, როგორც მოგეხსენებათ, ბერი, მიტროპოლიტი უნდა ცხოვრობდეს ეპარქიის შენობაში, რეზიდენციაში ან მონასტერში“, - განაცხადა აქციის ერთ-ერთმა მონაწილემ, თეოლოგმა კონსტანტინე ქათამაძემ.