საზოგადოება
კოკი იონათამიშვილი: „ამაზრზენი ხარ, მიშა!“
საქართველო, 2 ივლისი, საქინფორმი. გუშინ თბილისის საკრებულოს ფრაქცია „ნაციონალური მოძრაობის“ თავმჯდომარემ კოკი იონათამიშვილმა „ნაცმოძრაობა“ დატოვა და ამის შესახებ სოციალურ ქსელში საგანგებო განცხადება გამოაქვეყნა, სადაც პარტიის დატოვების მიზეზებზე ისაუბრა. მისი თქმით, ბოლოს ხანს მიმდინარე პროცესებმა დაარწმუნა, რომ პარტია ვერ უმკლავდება მის წინაშე მდგარ ამოცანებს.
იონათამიშვილის მიერ პარტიის დატოვებიდან რამდენიმე საათში პრეზიდენტის ადმინისტრაციამ გამოაქვეყნა მისი წერილი სააკაშვილისადმი, სადაც დეპუტატი მას ბიზნესში 2%-იანი წილის 100 000 დოლარად გაყიდვაში დახმარებას სთხოვს.
აღნიშნულის შემდეგ ფრაქცია „ნაცმოძრაობის“ აწ უკვე ყოფილმა თავმჯდომარემ სოციალურ ქსელში მეორე განცხადება გაავრცელა, სადაც ნათქვამია, რომ ის გაოგნებულია სააკაშვილის მხრიდან ზემონახსენები წერილის გამოქვეყნების გამო. იონათამიშვილის განმარტებით, მის წინააღმდეგ დაწყებული ამგვარი კამპანიის მიზეზი იმის შიშია, რომ „ნაციონალურმა მოძრაობამ“ არ დაკარგოს გავლენა თბილისის საკრებულოზე.
„ჩემ წინააღმდეგ მიმართული კამპანია ნათელი მაგალითია იმისა, თუ რაოდენ "ძვირფასია" ადამიანი პარტიის ლიდერისთვის, ამიტომ დღეს უკვე მივმართავ ჩემს კოლეგებს, უამრავ კეთილშობილ, პროფესიონალ ადამიანს, რომ დატოვონ პარტია "ერთიანი ნაციონალური მოძრაობა" და ქვეყნის აღმშენებლობის საქმეში სხვა გზები ეძიონ.დაბოლოს, კიდევ თუ დარეკავთ, აუცილებლად შეგხვდებით. მაგრამ აწი რა გაქვს სათქმელი, მაინტერესებს. ჩემსას კი აქვე გეტყვი – ამაზრზენი ხარ, მიშა", - ნათქვამია განცხადებაში, რომელსაც უმრავლესობისა და უმცირესობის მხრიდან არაერთგვაროვანი გამოხმაურებები მოჰყვა. გოგა ხაჩიძემ კი ფეისბუქის საკუთარ გვერდზე შემდეგი სტატუსი დადო: „იონათამიშვილის განცხადების გამო, "ნაციონალური მოძრაობა" კოკირებულია!...“
