საქართველო, 1 ივლისი, საქინფორმი. აშშ-ის საერთაშორისო რესპუბლიკური ინსტიტუტის (IRI) მიერ ჩატარებული საზოგადოებრივი აზრის გამოკითხვის შედეგად, რომელშიც საქართველოს სხვადასხვა რეგიონიდან  4000 კაცი მონაწილეობდა, გაირკვა, რომ რესპონდენტთა 41% პრეზიდენტობის კანდიდატად „ქართული ოცნების“ წარმომადგენელ გიორგი მარგველაშვილს უჭერს მხარს, “ნაციონალური მოძრაობის“ კანდიდატს ხმა მისცა 11%-მა, ხოლო დანარჩენი შედეგები ასე გადანაწილდა: ნინო ბურჯანაძე - 7%; შალვა ნათელაშვილი -  5%; სალომე ზურაბიშვილი - 5%. სხვა  კანდიდატებმა 5%-ზე ნაკლები მოაგროვეს, 9% არცერთ დასახელებულ კანდიდატს არ უჭერს მხარს, 14%-ს კი  ჯერ გადაწყვეტილება არ მიუღია.

საქინფორმის მკითხველს შევახსენებთ, რომ “ერთიანი ნაციონალური მოძრაობის“ საპრეზიდენტო კანდიდატის გამოსავლენად ჩატარებულ პრაიმერიზში დავით ბაქრაძე ლიდერობს. პრაიმერიზში „ნაციონალური მოძრაობის“ ოთხი წევრი მონაწილეობს - დავით ბაქრაძე, გიორგი ბარამიძე, ზურაბ ჯაფარიძე და შოთა მალაშხია.

მკითხველს შევახსენებთ, აგრეთვე, რომ 28 ივნისს გამართულ ბრიფინგზე საპარლამენტო უმცირესობის ლიდერმა დავით ბაქრაძემ განაცხადა, რომ იგი მზადაა მიიღოს პარლამენტის თავმჯდომარის და პრემიერ–მინისტრის შემოთავაზება და მათთან პოლიტიკური კონსულტაციები გამართოს.