სამართალი
ფოთის სანაპირო დაცვის ბაზას ნატოს ევროპის გაერთიანებული ძალების უმაღლესი მთავარსარდლის მოადგილე სერ რიჩარდ შირეფი ეწვია
საქართველო, 1 ივლისი, საქინფორმი. გუშინ, 30 ივნისს, ფოთის სანაპირო დაცვის ბაზას ნატოს ევროპის გაერთიანებული ძალების უმაღლესი მთავარსარდლის მოადგილე სერ რიჩარდ შირეფი ეწვია, სადაც შინაგან საქმეთა მინისტრის მოადგილე ვახტანგ გომელაურს, სასაზღვრო პოლიციის დეპარტამენტის დირექტორ კობა ბოჭორიშვილს და სასაზღვრო პოლიციის სხვა მაღალი თანამდებობის პირებს შეხვდა. რიჩარდ შირეფი ადგილზე გაეცნო სასაზღვრო სფეროში გატარებულ რეფორმებს და ფოთის სანაპირო დაცვის ბაზა დაათვალიერა.
შეხვედრის შემდეგ უმაღლესი მთავარსარდლის მოადგილე სანაპირო დაცვის კატარღით საქართველოს ტერიტორიულ წყლებში გაიყვანეს, სადაც რიჩარდ შირეფი სანაპირო დაცვის ეკიპაჟების მიერ ზღვაზე გამართულ საჩვენებელ ვარჯიშს დაესწრო.
ცნობისათვის: შსს-ს სანაპირო დაცვის დეპარტამენტი ხმელთაშუა ზღვაში ნატოს ანტიტერორისტულ ოპერაციაში „აქტიური ძალისხმევა“ ინფორმაციის გაცვლის გზით მონაწილეობს. წლის ბოლოსათვის სამინისტრო გეგმავს ნატოს საზღვაო სარდლობაში, რომელიც განთავსებულია დიდ ბრიტანეთში, ქალაქ ნორვუდში, მეკავშირე ოფიცერი მიავლინოს.
 |
