საქართველო, 27 ივნისი, საქინფორმი. 28-29 ივნისს ბათუმში, სასტუმრო „შერატონში“ საქართველოს თავდაცვისა და უსაფრთხოების კონფერენცია გაიმართება, რომელსაც საქართველოს თავდაცვის მინისტრი ირაკლი ალასანია გახსნის. საერთაშორისო ფორუმის მონაწილეებს სიტყვით მიმართავს საქართველოს პრემიერ-მინისტრი ბიძინა ივანიშვილი. კონფერენციას დაესწრებიან ვიცე-პრემიერები გიორგი მარგველაშვილი და კახა კალაძე, ასევე მინისტრთა კაბინეტის სხვა წევრები.

მოწვეულ სტუმრებს შორის არიან აშშ-ის თავდაცვის მდივნის მოადგილის თანაშემწე ეველინ ფარკასი, გაერთიანებული სამეფოს მინისტრი საერთაშორისო სტრატეგიის საკითხებში ენდრიუ მურისონი, მაკედონიის თავდაცვის მინისტრი ტალატ ხაფერი, ევროპაში მოკავშირეთა უმაღლესი ძალების სარდლის მოადგილე, გენერალი სერ რიჩარდ შირეფი, ISAF-ის ოპერაციის მეთაური, გენერალი ჯოზეფ დანფორდი, ნატოს საერთაშორისო სამსახურის თავდაცვის პოლიტიკისა და დაგეგმვის დირექტორატის უფროსი ფრენკ ბოლანდი, პოლონელი სენატორი ბოგდან კლიხი, ნატოს წევრი ქვეყნების ელჩები და გაერთიანებული შტაბის უფროსები.