საქართველო, 26 ივნისი, საქინფორმი. არასამთავრობო ორგანიზაცია “ქალები მშვიდობისათვის” ლიდერი ლალი ანთია გაზეთ “ქრონიკა+”-ში გამოქვეყნებულ სკანდალურ ინტერვიუში ფარდას ხდის თხილის ქარხანა “არგონატსში” მდებარე გასაიდუმლოებულ შტაბსა და საიდუმლო თათბირებს, რომლებსაც სამეგრელო-ზემო სვანეთის ყოფილი გუბერნატორი ზაზა გოროზია მართავდა.

„წინასაარჩევნო შტაბს სოფლის მეურნეობის მინისტრის ზაზა გოროზიას მოადგილე, წარმოშობით სენაკელი გია სოსელია ხელმძღვანელობდა. მისი შვილი, ბექა სოსელია კი სამხარეო შტაბს განაგებდა და ახალგაზრდა ზონდერთა ჯგუფს ხელმძღვანელობდა”, - აცხადებს ლალი ანთია.

მისივე  განცხადებით, გოროზიას მიერ შექმნილ საიდუმლო შტაბში ყოველღამე თათბირები იმართებოდა, სადაც სამეგრელოს კუდის უფროსებს, საკრებულოს მაღალჩინოსნებს, გამგებლებსა და მაჟორიტარი დეპუტატობის კანდიდატებს იბარებდნენ.

„სწორედ ამ თათბირებზე განიხილებოდა ზონდერ-ჯგუფების მთავარი მიმართულებები და ძირითადი სტრატეგია. ღამის თათბირებზე იბარებდნენ ასევე ადგილობრივ ბიზნესმენებს... მთავარი მიზანი იყო ფულის, ანუ წილების ჩადება და იარაღის ყიდვა-შენახვა”, - აცხადებს ლალი ანთია, რომლის თქმითაც, რეგიონში შავი სამუშაოები და იარაღის შემოტანა წალენჯიხის კუდის უფროს ზაალ ღურწკაიას ევალებოდა.