საქართველო, 18 ივნისი, საქინფორმი. სასჯელაღსრულების მინისტრი სოზარ სუბარი გაზეთ ”ალიასთვის” მიცემულ ინტერვიუში ციხეებში სექსმუშაკების შესვლას ადასტურებს. მინისტრის თქმით, ეს ხდებოდა და დღესაც ხდება.

“გამონაკლისი ქართული ციხე არ არის, პატიმარი ცდილობს, ხელი მოაწეროს ქალბატონთან, რომელსაც თქვენ სექსმუშაკად მოიხსენიებთ, ხდება ფიქციური ქორწინება. რა თქმა უნდა, დარწმუნებული არ ვარ, რომ პატიმრებს ამ საქმეში არაკეთილსინდისიერი თანამშრომლები არ ეხმარებიან. შესაბამისად, მათ ეძლევათ უფლება კანონით გათვალისწინებული გრძელვადიანი პაემნების”, - განაცხადა სოზარ სუბარმა.

ამასთან, მინისტრი სასჯელაღსრულების დაწესებულებებში ბუნტის მოწყობის შესახებ გავრცელებულ ინფორმაციასაც გამოეხმაურა და აღნიშნა, რომ მსგავსი არაფერი იგეგმება.