საქართველო, 12 ივნისი, საქინფორმი. შს მინისტრი ირაკლი ღარიბაშვილის განცხადებით, რომელიც მან გუშინ უშიშროების საბჭოს სხდომის დასრულების შემდეგ გააკეთა, თალიბების სახელით გავრცელებული ვიდეო საქართველოდან არის ატვირთული.

„მინდა დაგიდასტუროთ, რომ ამ ვიდეოს წარმომავლობას არანაირი კავშირი თალიბებთან არ აქვს... არსებული მონაცემებით, ვიდეო ატვირთულია საქართველოდან. IP მისამართი იდენტიფიცირებულია, ადგილმდებარეობა - დადგენილი. ამჟამად აქტიური საგამოძიებო მოქმედებები მიმდინარეობს, რომლებშიც ჩართულია FBI, ასევე ისრაელის მხარე", - განაცხადა ღარიბაშვილმა.

ამასთან, ირაკლი ღარიბაშვილმა უშიშროების საბჭოს შეხვედრებს არაეფექტიანი და ფორმალური უწოდა.

"მე, როგორც ხალხის მიერ არჩეული მთავრობის წარმომადგენელი, ვმონაწილეობ უშიშროების საბჭოს მუშაობაში, მაგრამ მიმაჩნია, რომ ეს აბსოლუტურად არაეფექტური და უუნარო უშიშროების საბჭოა", - აღნიშნა მინისტრმა.