პოლიტიკა
პრემიერი ივანიშვილი უშიშროების საბჭოს სხდომას არ დაესწრება
საქართველო, 11 ივნისი, საქინფორმი. საქართველოს პრემიერ-მინისტრი ბიძინა ივანიშვილი ეროვნული უშიშროების საბჭოს დღევანდელ სხდომას, რომელიც, საქართველოს პრეზიდენტის ინიციატივით 18 საათზე, პრეზიდენტის სასახლეში გაიმართება, არ დაესწრება იმ მოტივით, რომ სხდომაზე განსახილველი თემები მისთვის საინტერესოდ არ მიაჩნია.
“სხდომაზე "აისაფის" საერთაშორისო ოპერაციაში მონაწილე ქართულ შენაერთებზე განხორციელებული თავდასხმისა და ქართველი სამხედროებისა და საქართველოს მოსახლეობის მიმართ მუქარის შემცველი ვიდეოკლიპების გავრცელებისა და მასთან დაკავშირებული უსაფრთხოების საკითხები განიხილება", - აღნიშნულია უშიშროების საბჭოს განცხადებაში.
პრემიერის განცხადებით, უშიშროების საბჭოს დღევანდელ სხდომას საგარეო საქმეთა, შინაგან საქმეთა და თავდაცვის მინისტრები დაესწრებიან. „დღის წესრიგი ვნახე და მასში შესულია "აისაფის" და ვიდეოკლიპების საკითხი. ჩემთვის ამ ეტაპზე არც ერთი არ არის ისეთი საინტერესო, რომ ამ შეკრებაზე წავიდე, თუმცა საბჭოს სხდომას დაესწრებიან ღარიბაშვილი, ალასანია და ფანჯიკიძე", - განაცხადა ბიძინა ივანიშვილმა.მისივე თქმით, ყველაზე მეტი შეკითხვა პრეზიდენტთან საგარეო საქმეთა მინისტრს აქვს, რადგან ფანჯიკიძეს აინტერესებს, რატომ უშლის ხელს სააკაშვილი ელჩების დანიშვნის პროცესს. „ფანჯიკიძე ასევე დაინტერესდება, რატომ მოძრაობს ეს კაცი, რისთვის დადის და სად დადის. თუ ის არის ქვეყნის პრეზიდენტი, ეს ვიზიტები შეთანხმებული უნდა იყოს საგარეო საქმეთა სამინისტროსთან და მან ამ უწყებასთან უნდა ითანამშრომლოს", - აღნიშნა პრემიერმა.
