საქართველო, 5 ივნისი, საქინფორმი. რფ-ის პრემიერ-მინისტრმა დიმიტრი მედვედევმა შვედეთისა და ფინეთის ნატოში შესაძლო გაწევრებაზე კომენტარი გააკეთა: “ეს მათი საქმეა, ისინი თვითონ იღებენ გადაწყვეტილებებს ეროვნული სუვერენიტეტის დოქტრინის შესაბამისად. მაგრამ არ შეგვიძლია არ გავითვალისწინოთ, რომ ჩვენთვის ბლოკი ნატო - უბრალოდ რაღაც უცხო ფორმირება არ არის, ეს არის სტრუქტურა, რომელსაც გარკვეული სამხედრო პოტენციალი აქვს“.

ამასთან, მედვედევმა ხაზი გაუსვა, რომ ბლოკის ახალი მონაწილეები, რომლებიც რუსეთის საზღვრებთან იმყოფებიან, ძალების განლაგებას ცვლიან, ამიტომ რუსეთი ვალდებული იქნება, ალიანსის გაფართოებაზე რეაგირება მოახდინოს.

“საქართველომ აირჩია ნატოსთან ინტეგრაციის გზა და მასზე უარის თქმას არ აპირებს“, - განაცხადა საქართველოს თავდაცვის მინისტრმა ირაკლი ალასანიამ რფ-ის პრემიერის ზემოთ მოყვანილი განცხადების კომენტირებისას.

“ჩვენმა ხალხმა, 75%-ზე მეტმა, მხარი დაუჭირა ნატოში შესვლას, როგორც ჩვენი უსაფრთხოების გარანტიას,  ჩვენ ამ დაკვეთას ვასრულებთ და ალიანსში მივისწრაფვით“, - ხაზი გაუსვა მან.

(ალასანია არაკორექტულია, თუ 2008 წლის იანვრის პლებისციტს გულისხმობს, რადგან რეფერენდუმი საქართველოს ნატოში გაწევრების საკითხზე არ ჩატარებულა. საზოგადოებრივი აზრის გამოკითხვა, რადაც გვევლინება პლებისციტი, შესაძლოა მხოლოდ ეგზიტპოლებს შევადაროთ, და არავითარ შემთხვევაში - საყოველთაო-სახალხო ხმის მიცემას, როგორიც არის რეფერენდუმი! - საქინფორმი).