უცხოეთი
ეგვიპტეში დაკავებული ქართველი ტურისტები “რუსთავი 2“-ის პროექტის მონაწილენი აღმოჩნდნენ
საქართველო, 3 ივნისი, საქინფორმი. ეგვიპტის სანაპირო დაცვამ 10 უცხოელი დააკავა, რომლებიც ქალაქ ჰურგადას მახლობლად მდებარე ერთ-ერთ კუნძულზე პორნოგრაფიის გადაღებაში მონაწილეობდნენ, - განაცხადა კვირას ელექტრონულმა პორტალმა „ალ-მასრი იალ იაუმ“. შიშველი მამაკაცებისა და ქალების კომპანია პორნოფილმის გადაღებისას ეგვიპტის საზღვაო მესაზღვრეთა ერთ-ერთმა პატრულმა შენიშნა. მსახიობები და გადამღები ჯგუფი ტურისტულ პოლიციას გადასცეს და პოლიციის განყოფილებაში მიიყვანეს, სადაც სასამართლო უნდა გამართულიყო. „ალ-მასრი იალ-იაუმის“ ცნობით, დაკავებულები საქართველოს მოქალაქეები არიან.
გუშინ კი ცნობილი გახდა, რომ ეგვიპტეში დაკავებული 12 საქართველოს მოქალაქე ტელეკომპანია „რუსთავი 2“-ის პროექტ „ტოპ-გოგოს“ მონაწილეები და შემოქმედებითი ჯგუფის წევრები იყვნენ. მათ ფოტოსესია ჰქონდათ და ჰურგადის პოლიციამ ისინი შეცდომით დააკავა. პოლიციაში მათ 5 საათი დაჰყვეს, თუმცა გარემოებათა გამორკვევის შემდეგ ისინი გაათავისუფლეს და ბოდიში მოუხადეს. 
