საქართველო, 24 მაისი, საქინფორმი. ყოფილი პრემიერ-მინისტრის ვანო მერაბიშვილის ადვოკატ გიორგი ჩივიაშვილის განცხადებით, რომელიც მან დღეს გამართულ ბრიფინგზე გააკეთა, ქუთაისის საქალაქო სასამართლოს გადაწყვეტილებას სააპელაციო სასამართლოში დღეს გაასაჩივრებენ. მისი თქმით, ბრალდების მიერ წამოყენებული არგუმენტები აბსურდულია, რადგან სისხლის სამართლის კოდექსში არსებობს ჩამონათვალი, რა შემთხვევაში უნდა იყოს პირი დაკავებული. „ესენია, როდესაც გამოძიებასთან არ თანამშრომლობს ან ძებნილია. არც ერთი გარემოება ვანო მერაბიშვილისა და ზურაბ ჭიაბერაშვილის მიმართ არ მოიძებნება. ეს ბატონები ყოველთვის ცხადდებოდნენ საგამოძიებო ორგანოებში... ამ პერიოდში მათ 4 ჯერ მისცეს ჩვენება და ყველა დაძახებაზე გამოცხადდნენ... ბრალდება მიუთითებს, რომ თურმე მერაბიშვილს აქვს საზოგადოებაზე ძალიან დიდი გავლენა... მას წლების განმვლობაში ეკავა წამყვანი თანამდებობები, ასევე ახლა უკავია პარტიის გენერალური მდივნის პოსტი და გასაგებია, რომ მას ექნება გარკვეული გავლენა საზოგადოების რაღაც ნაწილზე, მაგრამ ეს არ არის საფუძველი, რომ ადამიანი იყოს დაკავებული,“ - განაცხადა ჩივიაშვილმა.

ამასთან, ადვოკატის განმარტებით, სააპელაციო საჩივარში მოყვანილი ერთ-ერთი მნიშვნელოვანი გარემოება არის არაუფლებამოსილი პირის მიერ სამართლებრივი დევნის დაწყება.