საქართველო, 23 მაისი, საქინფორმი. ბათუმში სასტუმრო „შერატონში“ ა.წ. 21-23 მაისს შავი ზღვისა  და კასპიის ზღვის რეგიონების უსაფრთხოების სიმპოზიუმი ჩატარდა, რომელშიც მონაწილეობას იღებდენ აშშ-ის ევროპული სარდლობის დაზვერვის წარმომადგენლები, შავი და კასპიის ზღვების რეგიონების ქვეყნების - საქართველოს, ბულგარეთის, რუმინეთის, მოლდოვას, უკრაინის, სომხეთის, აზერბაიჯანის, თურქეთის, თურქმენეთისა და ყაზახეთის სამხედრო დაზვერვის ხელმძღვანელი პირები, სამხედრო ატაშეები  და ექსპერტები. კონფერენცია საქართველოს შეიარაღებული ძალების გაერთიანებული შტაბის სამხედრო დაზვერვის დეპარტამენტის უფროსმა, პოლკოვნიკმა რომან ჯოხაძემ გახსნა.

სიმპოზიუმის მონაწილეები ორი დღის განმავლობაში განიხილავდნენ რეგიონული უსაფრთხოების საკითხს, სოჭის ოლიმპიადის უსაფრთხოებას და მის წინააღმდეგ არსებულ საფრთხეებს, ასევე, ახლო აღმოსავლეთის რეგიონში შექმნილი კრიზისის შესაძლო გადმოდინებას კავკასიის რეგიონზე.

ცნობისათვის: სიმპოზიუმი 2006 წელს დაარსდა და პირველად ვაშინგტონში ჩატარდა, ის აშშ-ის სამხედრო დაზვერვის სააგენტოს (DIA) პროექტს წარმოადგენს, რომელიც წელიწადში ერთხელ ტარდება და მიზნად ისახავს შავი და კასპიის ზღვების რეგიონების ქვეყნების სამხედრო დაზვერვის სამსახურების დაახლოებას და რეგიონული უსაფრთხოების საკითხების ირგვლივ კონსოლიდირებას.

სიმპოზიუმი-სემინარის ორგანიზებაში DIA-ს დაზვერვის ეროვნული უნივერსიტეტი და აშშ-ის ევროპული სარდლობის J-2 დაზვერვის სამსახური არიან ჩართული.