აქტუალური
„იდენტობას“ თავს დაესხნენ
საქართველო, 21 მაისი, საქინფორმი. „პირველი რადიოს“ მიერ გავრცელებული ცნობით, ცოტა ხნის წინ „იდენტობის“ ოფისში შეჭრა სცადეს. ორგანიზაციის აღმასრულებელი დირექტორის ირაკლი ვაჭარაძის თქმით, მამაკაცი, რომელიც ოფისში შეჭრას ცდილობდა, ხმამაღლა ყვიროდა, უნდოდა დაენახა, ვინ იყო შენობაში. ირაკლი ვაჭარაძე აცხადებს, რომ 17 მაისის შემდეგ “იდენტობის“ წევრებზე აგრესიულმა თავდასხმებმა განსაკუთრებით იმატა.
ვაჭარაძის თქმით, როდესაც უმრავლესობის ლიდერი დავით საგანელიძე პირდაპირ ეთერში აცხადებს, რომ “იდენტობის“ წევრები სხეულსაც გაყიდიან გრანტის გულისთვის, სალაპარაკო აღარაფერია.
ამ წუთებში თბილისის საქალაქო სასამართლოში 17 მაისის აქციაზე მომხდარ ინციდენტთან დაკავშირებით 4 დაკავებულის სასამართლო პროცესი იწყება. საქალაქო სასამართლოსთან უფლებადამცველები, ოჯახის წევრები და მეგობრები იმყოფებიან. შეკრებილები მათ დაკავებას აპროტესტებენ და დღესვე დარბაზიდან გათავისუფლებას მოითხოვენ.
