პოლიტიკა
პრემიერი ივანიშვილი: „საშუალო რგოლზე ამნისტიის შემოღება მოგვიწევს“
საქართველო, 14 მაისი, საქინფორმი. დღეს, დილის 11 საათზე, Expo Georgia-ს საგამოფენო ცენტრში საქართველოს პრემიერ-მინისტრ ბიძინა ივანიშვილის პრესკონფერენცია გაიმართა, რომელიც მთავრობის მეთაურმა ავღანეთში დაღუპული ჯარისკაცების ოჯახებისთვის სამძიმრის გამოთქმით დაიწყო, შემდეგ კი საგარეო მდგომარეობა და საქართველოში ახლად შექმნილი ვითარება გააანალიზა. მათ შორის, ილაპარაკა იმაზეც, რომ სახელისუფლებო გუნდი ფიქრობს ამნისტიაზე, რომელიც მაღალი თანამდებობის პირებს, კერძოდ, პარლამენტარებსა და მინისტრებს არ უნდა შეეხოს.
“მე ვფიქრობ, რომ საშუალო და მცირე რგოლზე ამნისტიის შემოღება მოგვიწევს. პროცესები ხურდება. ჯერ მე როგორც ვიცი, პროკურატურაში ძალიან ბევრი განცხადებაა შესული. პროკურატურას ჰქონდა ძალიან ბევრი ინფორმაცია. მუშაობა მიმდინარეობს და არ იქნება სასურველი, მასობრივი სასჯელები და დაპატიმრებები მოხდეს საქართველოში, რისი ეჭვებიც არსებობს. მე ვფიქრობ, რომ ამნისტია საჭირო გახდება”, – განაცხადა პრემიერმა. 
