აქტუალური
საქართველოში ახალი, ნატოს სტანდარტების შესაბამისი სამხედრო ბაზა შენდება
საქართველო, 3 მაისი, საქინფორმი. 2014 წლის ბოლოსთვის საქართველოს შეიარაღებულ ძალებს თანამედროვე, ნატოს სტანდარტების შესაბამისი სამხედრო ბაზა ექნება - კრწანისის პირველ ქვეით ბრიგადაში სამშენებლო სამუშაოები განახლდა. მშენებლობის პროცესი თავდაცვის მინისტრის მოადგილემ ზაზა ბროლაძემ და გაერთიანებული შტაბის უფროსის პირველმა მოადგილემ, ბრიგადის გენერალმა ვახტანგ კაპანაძემ დაათვალიერეს.
„ვაგრძელებთ პირველი ქვეითი ბრიგადის სამხედრო ქალაქის მშენებლობას, რომელიც 3000 სამხედრო მოსამსახურეზეა გათვლილი. გათვალისწინებულია სამხედროების სპორტული დარბაზებით, სტადიონებით, სასადილოებით, კაფეებით, აგრეთვე, საავტომობილო და ჯავშანტექნიკის სადგომებით უზრუნველყოფა. წელს სამხედრო ყაზარმების დასრულებას ვაპირებთ, მომავალი წლისთვის კი კომპლექსის მშენებლობის სრულად დასრულება და სამხედროებისათვის გადაცემა გვაქვს დაგეგმილი“ - განაცხადა ზაზა ბროლაძემ.
„ახალ ბაზაზე გადმოყვანით, პირველი ქვეითი ბრიგადა დაიხვეწება და განვითარდება, როგორც ნატოს ოპერაციებში მონაწილე სამხედრო ქვედანაყოფი. უმაღლესი სტანდარტებით მოწყობილ ბაზაზე, I ქვეითი ბრიგადა შეძლებს იმ წვრთნების განხორციელებას, რაც ნატოს სტანდარტებით არის გათვალისწინებული“ - აღნიშნა ბრიგადის გენერალმა ვახტანგ კაპანაძემ.
