საქართველო, 2 მაისი, საქინფორმი. თბილისის შს მთავარი სამმართველოს ძველი თბილისის სამმართველოს მე-3 განყოფილების თანამშრომლებმა თსუ-ს სტუდენტი, 1992  წელს დაბადებული ლევან ღ. მკვლელობის მცდელობის ბრალდებით დააკავეს.

დაკავებულმა ივანე ჯავახიშვილის სახელობის თბილისის სახელმწიფო უნივერსიტეტის მე-2 კორპუსში თანაკურსელი, 1990 წელს დაბადებული გვანცა ა. მე-3 სართულის შიდა კიბის მოაჯირიდან  ძალის გამოყენებით გადააგდო, რის შედეგად  გოგონა მძიმედ დაშავდა. დაზარალებული რესპუბლიკური საავადმყოფოს სასწრაფო სამედიცინო დახმარების ცენტრში გადაიყვანეს, სადაც მას გადაუდებელი ოპერაცია ჩაუტარდა.  გვანცა ა-ს ჯანმრთელობის მდგომარეობა ამ დროისათვის მძიმეა.

თვითმხილველების ინფორმაციით, გოგონამ შეყვარებულთან იჩხუბა, რა დროსაც ახალგაზრდა მამაკაცმა მას ხელი ჰკრა და კიბიდან გადმოაგდო.  ინციდენტი სახელმწფო უნივერსიტეტში გუშინ, დაახლოებით 16 საათზე მოხდა.