საქართველო, 26 აპრილი, საქინფორმი. მხოლოდ ბიზნესს შეუძლია გადაჭრას ქვეყანაში არსებული მძიმე პრობლემები. ამის შესახებ საქართველოს პრემიერ-მინისტრმა ბიძინა ივანიშვილმა სასტუმრო „თბილისი მარიოტში“ გამართულ საქართველო-უკრაინის ბიზნესფორუმზე განაცხადა. ფორუმი, რომელსაც 50-მდე უკრაინული კომპანიის 80 წარმომადგენელი ესწრება, დღეს საქართველოს პრემიერ-მინისტრმა გახსნა. მან სიტყვით მიმართა ფორუმის მონაწილეებს და თავისუფალი ბიზნესგარემოს შექმნის პირობა მისცა.

„ჩემთვის დიდი პატივია, მივესალმო მეგობარი ქვეყნის ბიზნესის წარმომადგენლებს. გარწმუნებთ, რომ საქართველოში ჭეშმარიტად ახალი დრო დაიწყო. დამოკიდებულება ბიზნესის მიმართ განსაკუთრებულია, რადგან კარგად ვაცნობიერებთ, რომ მხოლოდ ბიზნესს შეუძლია არსებული ეკონომიკური პრობლემების მოგვარება. უახლოეს რამდენიმე წელიწადში საქართველო ბიზნესისთვის იქნება უნიკალური ქვეყანა, რადგან იქნება დამოუკიდებელი მედია და სტაბილური პოლიტიკური და ბიზნეს-გარემო. ვერც ერთი ჩინოვნიკი ვერ გაბედავს ჩაერიოს ბიზნესის საქმიანობაში. გარწმუნებთ, რომ საქართველოში ბიზნესის კეთებისთვის ევროპისა და ამერიკის ქვეყნებზე არანაკლები პირობები იქნება. იმ ქვეყნებისგან განსხვავებით, საქართველოში ბაზარი ცარიელია“, - განაცხადა ბიძინა ივანიშვილმა.