საქართველო, 24 აპრილი, საქინფორმი. გაზეთ „ყველა სიახლის“ მიერ გავრცელებული ინფორმაციით, დათა ახალაიას ჰქონდა ინფორმაცია, რომ ვანო მერაბიშვილი  ციხეში ბაჩო ახალაიას ლიკვიდაციას გეგმავდა (მასაც ჰყავს მერაბიშვილის ახლო გარემოცვაში ინფორმატორები). სწორედ ეს იყო ძირითადი მიზეზი იმისა, რომ დათა ახალაიამ სოციალურ ქსელში თავისი ცნობილი განცხადება გაავრცელა. ამის შესახებ გაზეთს ახალაიების ახლო ნათესავმა განუცხადა, რომელიც 2005-20012 წლებში პროკურატურის თანამშრომელი იყო.

„დათა ახალაია სამართალდამცველებს მიაწვდის ისეთ ღირებულ მტკიცებულებებს კონკრეტულ სისხლის სამართლის საქმეებზე, რომ ახალი ხელისუფლება, სავარაუდოდ, ახალაიებს ბრალს შეუმსუბუქებს. რაც შეეხება კონკრეტულ მასალებს, რომლებიც აქვს დათა ახალაიას, მე, როგორც იურისტი, არ ვიქნები მართალი, მოგაწოდოთ ისეთი ინფორმაცია, რომელიც გამოძიებას დააზარალებს. ვიტყვი მხოლოდ ერთ-ერთ სისხლის სამართლის საქმეზე, რომლის შესახებაც დათა და ბაჩო ახალაიებმა ძალიან ბევრი იციან და აქვთ მტკიცებულებანი. ეს გახლავთ ზურაბ ჟვანიას საქმე", - აღნიშნავს ჟურნალისტთან საუბრისას რესპონდენტი.

მისივე თქმით, „ძალიან მალე ჟვანიას მკვლელობის საქმე გაიხსნება და გამოძიებას ექნება მტკიცებულება მასთან მიხეილ სააკაშვილისა და ვანო მერაბიშვილის კავშირის შესახებ“.

წყაროს განმარტებით, დათა ახალაია, ძმისგან განსხვავებით, არ ენდო სააკაშვილისა და მერაბიშვილის დაპირებებს, რომ ნებაყოფლობით ჩაჰბარებოდა სამართალდამცველებს. ხოლო როცა მის წინააღმდეგ სისხლის სამართლის საქმე აღიძრა, მან თავი ჯერ ეკლესიას შეაფარა, ხოლო შემდეგ საქართველო დატოვა.