საქართველო, 22 აპრილი, საქინფორმი. საქართველოს პრემიერ-მინისტრი ბიძინა ივანიშვილი, რომელიც სტრასბურგში სპეციალური მიწვევით იმყოფება, დღეს ევროპის საბჭოს საპარლამენტო ასამბლეის პრეზიდენტ ჟან კლოდ მინიონს შეხვდა. შეხვედრაზე მხარეებმა საქართველოს მიერ ნაკისრი ვალდებულებების შესახებ იმსჯელეს. როგორც პრემიერ-მინისტრმა აღნიშნა, საქართველო დიდ მნიშვნელობას ანიჭებს ევროპის საბჭოსთან ინსტიტუციური დიალოგის გაგრძელებას და უფრო აქტიურ თანამშრომლობას მოელის.

შეხვედრას საქართველოს დელეგაციის მხრიდან ესწრებოდნენ საგარეო საქმეთა მინისტრი მაია ფანჯიკიძე, იუსტიციის მინისტრი თეა წულუკიანი, პარლამენტის საგარეო ურთიერთობათა კომიტეტის თავმჯდომარე თედო ჯაფარიძე, პარტია "ქართული ოცნება - დემოკრატიული საქართველოს" აღმასრულებელი მდივანი არმაზ ახვლედიანი, ევროპის საბჭოში საქართველოს მუდმივი წარმომადგენლის მოვალეობის შემსრულებელი ირაკლი გივიაშვილი.

შეხვედრის დაწყებამდე ბიძინა ივანიშვილმა ევროპის საბჭოს “ოქროს წიგნში” ხელმოწერა დატოვა, ევროპის საბჭოში გამართული შეხვედრის დასრულების შემდეგ კი ბიძინა ივანიშვილმა და ჟან კლოდ მინიონმა ჟურნალისტებისთვის კომენტარი გააკეთეს.