საქართველო, 16 აპრილი, საქინფორმი. ერეკლე მეორის საზოგადოება მიესალმება ბევრი დემოკრატიული სახელმწიფოს მხრიდან სომხების გენოციდის აღიარებას და მოუწოდებს საქართველოს მთავრობას, დემოკრატიული თანამეგობრობის მაგალითს მიჰბაძოს. როგორც ИА REGNUM-ს საზოგადოების თავმჯდომარემ არჩილ ჭყოიძემ განუცხადა, სომეხთა გენოციდის აღიარების მოწოდებით ისინი დღეს, 2013 წლის 17 აპრილს, კიდევ ერთხელ მიმართავენ საქართველოს ხელისუფლებას კონფერენციაზე "ჰაოს-ქართლოსიდან დღევანდელობამდე", რომელიც დღეს სასტუმრო "ამბასადორში" ჩატარდება.

კონფერენციის ორგანიზაციაში მონაწილეობს თბილისის სომეხთა ასამბლეაც.

“კონფერენციის მონაწილეები წუთიერი დუმილით პატივს მიაგებენ 1915 წელს ოსმალეთის იმპერიის მიერ მოწყობილი გენოციდის მსხვერპლთა ხსოვნას, ხოლო ერეკლე მეორის საზოგადოება და თბილისის სომეხთა ასამბლეა კიდევ ერთხელ მოუწოდებენ მთავრობას, აღიაროს სომეხი ხალხის გენოციდი, რომელიც თავისი სიმწვავით ჰოლოკოსტს უტოლდება, მით უფრო, რომ ის აღიარა დემოკრატიული სახელმწიფოების თანამეგობრობამ“, - აღნიშნა არჩილ ჭყოიძემ და ხაზი გაუსვა, რომ საქართველოს წინა მთავრობამ სრულიად დაუსაბუთებლად სცნო ჩერქეზი ხალხის გენოციდი, რაც არც ერთ დემოკრატიულ სახელმწიფოს არ გაუკეთებია.

კონფერენციაზე განხილული იქნება ქართულ-სომხური ურთიერთობა, ისტორიის გაყალბების მცდელობები, რასაც შეგნებულად სჩადის ზოგიერთი სომეხი და ქართველი ისტორიკოსი და ავრცელებენ გარკვეული პოლიტიკოსები მოძმე ხალხებს შორის მტრობის გაღვივების მიზნით, და რასაც წინ უნდა აღუდგეს ქართველი და სომეხი საზოგადოება.